آج کونسی جماعت کہاں انتخابی جلسہ کریگی؟

اسلام آباد (قدرت روزنامہ)عام انتخابات کی تاریخ قریب آ رہی ہے اور سیاسی جماعتیں ملک کے مختلف شہروں میں انتخابی جلسے کر رہی ہیں . مسلم لیگ ن آج سیالکوٹ میں انتخابی جلسہ کرے گی، قائد مسلم لیگ ن نواز شریف جناح اسٹیڈیم میں جلسے سے خطاب کریں گے .

جلسے میں ن لیگ کے صدر شہباز شریف اور نائب صدر مریم نواز بھی شریک ہوں گی .
پیپلز پارٹی کی جانب سے حب بائی پاس روڈ پر عوامی اجتماع کا انعقاد کیا جائے گا، سابق صدر آصف زرداری کارکنوں سے خطاب کریں گے . جے یو آئی ایف آج لاڑکانہ میں میدان سجا رہی ہے، جمعیت علمائے اسلام (جے یو آئی) کے سربراہ مولانا فضل الرحمٰن خطاب کریں گے . اس کے علاوہ جمعیت علمائے اسلام کی جانب سے سکھر کے منزل گاہ گراؤنڈ میں عوامی اجتماع کا انعقاد کیا جائے گا، اجتماع سے مولانا فضل الرحمٰن خطاب کریں .
جماعتِ اسلامی کے تحت کراچی کے باغِ جناح میں آج جلسۂ عام منعقد ہو گا . امیرِ جماعتِ اسلامی پاکستان سراج الحق اور امیرِ جماعتِ اسلامی کراچی حافظ نعیم الرحمٰن جلسے سے خطاب کریں گے . اس حوالے سے امیرِ جماعتِ اسلامی کراچی حافظ نعیم الرحمٰن کا کہنا ہے کہ آج کراچی کے باغِ جناح گراؤنڈ میں 8 فروری کا فیصلہ ہو جائے گا .
پیپلز پارٹی کراچی کے علاقے لیاری میں آصفہ بھٹو کی قیادت میں ریلی نکالے گی . لیاری کے مختلف مقامات پر آصفہ بھٹو ریلی کے شرکاء سے خطاب کریں گی . متحدہ قومی موومنٹ (ایم کیو ایم) پاکستان کے زیرِ اہتمام حیدرآ باد میں انتخابی جلسہ ہو گا، جلسے سے خالد مقبول صدیقی اور دیگر رہنما خطاب کریں گے .
مہاجر قومی موومنٹ کراچی کے علاقے لانڈھی نمبر 5 میں الیکشن آفس کا افتتاح کرے گی . تقریب سے چیئرمین مہاجر قومی موومنٹ آفاق احمد خطاب کریں گے . لودھراں میں استحکامِ پاکستان پارٹی (آئی پی پی) کے رہنما جہانگیر ترین خطاب کریں گے .
پی ٹی آئی کے رہنما شیر افضل خان ڈی آئی خان میں کارکنوں سے خطاب کریں گے جبکہ صوابی میں پی ٹی آئی رہنما اسد قیصر عوامی اجتماع سے خطاب کریں گے . چارسدہ کے حلقے این اے 25 سے عوامی نیشنل پارٹی (اے این پی) کے رہنما ایمل ولی جلسہ سے خطاب کریں گے .
صوابی میں جمعیت علمائے اسلام ش کے رہنما مولانا شجاع الحق عوامی اجتماع سے خطاب کریں گے . بلوچستان نیشنل پارٹی کا انتخابی جلسہ آج کوئٹہ میں ہو گا، جس سے اختر مینگل اور دیگر رہنما خطاب کریں گے .