کراچی (قدرت روزنامہ)رہنما متحدہ قومی موومنٹ پاکستان ڈاکٹرفاروق ستار نے کہا ہے کہ حجت تمام کرنے کے لیے تمام سیاسی رہنماؤں سے بات کر رہے ہیں . ڈاکٹر فاروق ستار نے جیونیوز سے گفتگو کے دوران کہا ہے کہ آج ایم کیو ایم کی کوئی ملاقات طے نہیں ہے، ٹیلی فون پر مختلف پارٹیوں کے ر ہنماؤں سے رابطے جاری ہیں .
ڈاکٹرفاروق ستار کا کہنا ہے کہ ایم کیو ایم آپس میں مستقبل کے فیصلوں کے بارےمیں بات چیت کر رہی ہے . انہوں نے مزید کہا ہے کہ مسلم لیگ ن سے آج، ابھی تک ملاقات طے نہیں ہوئی ہے .
واضح رہے کہ نومنتخب سیاسی جماعتیں اتحادی حکومت بنانے کے لیے آج کل ایک دوسرے کے ساتھ رابطے میں ہیں . ایم کیو ایم پاکستان کا وفد اسلام آباد میں موجود ہے جہاں اُن کی مسلم لیگ ن سے طے شدہ ملاقات ملتوی ہو گئی تھی .
متحدہ قومی موومنٹ پاکستان کے وفد میں گورنر سندھ کامران ٹیسوری، خالد مقبول صدیقی، ڈاکٹر فاروق ستار اور مصطفی کمال شامل ہیں . ڈاکٹر فاروق ستار کے گزشتہ بیان کے مطابق اگلے 2 دن تک اسلام آباد میں مسلم لیگ (ن) سے ملاقاتوں کا سلسلہ جاری رہے گا .