وہ بینک جس کے عملے نے فراڈ کے ذریعے کسٹمرز کو اربوں روپے کا چونالگادیا

اسلام آباد(قدرت روزنامہ) دبئی اسلامک بینک( ڈی آئی بی) کے عملے نے فراڈ کےذریعے کسٹمرز کو اربوں روپے سے محروم کر دیا۔ ایکسپریس ٹربیون کے مطابق وفاقی تحقیقاتی ایجنسی (ایف آئی اے) کی طرف سے انکشاف کیا گیا ہے کہ فرانزک رپورٹ میں ڈی آئی بی کے عملے کے فراڈ میں ملوث ہونے کی تصدیق ہوئی ہے۔
ایف آئی اے کے ایڈیشنل ڈائریکٹر جنرل مجاہد اکبر خان نے سینیٹ کی قائمہ کمیٹی برائےخزانہ کو فراڈ کی اس واردات کے متعلق بریفنگ دیتے ہوئے بتایا ہے کہ ڈی آئی بی کے عملے نے ملی بھگت سے کسٹمرز کے جعلی دستخطوں کے ذریعے ان کے اکاؤنٹس سے رقوم نکلوائیں۔
مجاہد اکبر خان نے بتایا کہ ایف آئی اے نےڈی آئی بی کے سٹاف کے خلاف ایف آئی آر درج کرانے کا فیصلہ کیا ہے۔ رپورٹ کے مطابق حالیہ مہینوں میں بینک عملے کی طرف سے کسٹمرز کے ساتھ ہونے والا یہ دوسرا فراڈ ہے، جو سینٹ قائمہ کمیٹی میں زیربحث آیا۔ اس واردات میں بینک انتظامیہ فراڈ کے مرتکب سٹاف کے خلاف کارروائی کرنے کی بجائے انہیں بچانے کی کوشش کرتی رہی۔ قبل ازیں ایک اور بینک میں ایسے ہی فراڈ کا انکشاف ہوا تھا۔
مجاہد اکبر خان نے کہا کہ ہمارے پاس اس واردات کے شواہد موجود ہیں، جن میں جعلی چیک بکس، متوازی بینکنگ اور جعلی چیک کو کیش کرانا شامل ہے۔اجلاس میں قائمہ کمیٹی کے رکن سینیٹر فاروق ایچ نائیک نے کہا کہ متاثرہ کسٹمرز کو بہرصورت انصاف ملنا چاہیے۔ ایف آئی اے کو چاہیے کہ ڈی آئی بی آفیشلز کے خلاف تحقیقات کرے۔