انتخابات میں دھاندلی کیخلاف جی ڈی اے، پی ٹی آئی اور جماعت اسلامی کا مشترکہ جدوجہد کا اعلان

کراچی (قدرت روزنامہ) گرینڈ ڈیموکریٹک الائنس (جی ڈی اے) ، تحریک انصاف اور جماعت اسلامی نے عام انتخابات میں مبینہ دھاندلی کے خلاف مشترکہ جدوجہد کرنے کا اعلان کردیا ہے۔ سید صدرالدین شاہ راشدی سے پی ٹی آئی سندھ کے صدر حلیم عادل شیخ اور جماعت اسلامی کراچی کے امیر حافظ نعیم الرحمٰن نے ان کی رہائش گاہ پر ملاقات کرتے ہوئے مشترکہ جدوجہد کرنے کا اعلان کیا۔ جی ڈی اے کے سیکرٹری اطلاعات عبدالرحیم نے بتایا کہ ملاقات میں موجودہ سیاسی صورتحال اور مبینہ دھاندلی پر باہمی تعاون کے حوالے سے غور کیا گیا، سید صدر الدین شاہ راشدی نے دیگر رہنماﺅں کو جی ڈی اے کے 23 فروری کو ہونے والے اجلاس میں شرکت کی دعوت دی۔ ان کا کہنا تھا کہ ملاقات میں اس بات پر غور ہوا کہ اپوزیشن کی سخت گیر تحریک کی وجہ سے حکومت اور الیکشن کمیشن بوکھلاہٹ کا شکار ہے اور اس بات کا امکان ہے کہ سندھ اسمبلی کا اجلاس برائے حلف برداری کا اعلان اچانک کردیا جائے گا۔ انہوں نے کہا کہ اس صورت میں عوام اور تمام جماعتوں کے کارکنان اس دن سندھ بھر میں سخت احتجاج کریں گے جس پر اجلاس میں شریک رہنماﺅں نے اتفاق کیا۔ سردار عبدالرحیم نے مزید بتایا کہ 23 فروری کے اجلاس میں اس حوالے سے غور کے بعد حتمی اعلان کیا جائے گا۔