عقیدہ ختم نبوت پر سیاست بہت بڑا جرم، انتشار پیدا کرنے والوں کو روکا جائے: طاہر اشرفی

اسلام آباد(قدرت روزنامہ) نگران وزیراعظم کے معاون خصوصی طاہر محمود اشرفی نے کہا کہ عقیدہ ختم نبوت پر سیاست بہت بڑا جرم ہے، ابہام دور کرکے انتشار پیدا کرنے والوں کو روکا جائے .
معاون خصوصی طاہر محمود اشرفی نے کہا کہ اللہ نے قرآن میں فرمایا ہم نے ہی اس قرآن کو اتار اور ہم ہی حفاظت کریں گے، ہمارے سپہ سالار بھی حافظ قرآن ہیں، پنجاب گورنمنٹ بھی ابہامات کو دور کرنے کیلئے ریویو پٹیشن داخل کرے، جس نے بھی کلمہ پڑھا وہ عقیدہ ختم نبوت کا چوکیدار ہے .

طاہر اشرفی نے کہا کہ کچھ لوگوں نے عقیدہ ختم نبوت پر سیاست کی،عقیدہ ختم نبوت پر سیاست بہت بڑا جرم ہے، 8 فروری کو پرامن انداز میں انتخابی عمل مکمل ہوا، جب ہمارے دین کا معاملہ آئے تو ہم ایک ہیں .
انہوں نے مزید کہا کہ ہم اور ہماری روح آقا دو جہاں پر قربان ہے، ہمیں ہمارا دین دنیا سے بہت زیادہ عزیز ہے، قرآن کریم کے تحفظ کا ذمہ اللہ نے لیا ہوا ہے، آپ کو ہرگلی اور محلے میں ہزاروں حافظ ملیں گے، قرآن اور اپنے وطن سے ہر کوئی محبت کرتا ہے .
حافظ طاہر اشرفی نے کہا کہ جس طرح میرے حقوق کا تحفظ ضروری ہے ویسے ہی غیر مسلموں کا بھی ہے، سوشل میڈیا کو منفی پراپیگنڈے کیلئے استعمال کیا جارہا ہے .