ملک بھر میں کل سے انسداد پولیو مہم کا آغاز

اسلام آباد (قدرت روزنامہ)ملک میں ساڑھے 4 کروڑ سے زائد بچوں کو پولیو سے بچانے کے لیے قومی انسدادِ پولیو مہم کا آغاز کل سے ہو رہا ہے . پورے ملک میں 26 فروری سے 3 مارچ تک پولیو ورکرز گھر گھر جاکر پولیو سے بچاؤ کے قطرے پلائیں گے .

صوبۂ خیبر پختون خوا کے 33 اضلاع میں بچوں کو یہ قطرے 3 سے 9 مارچ تک پلائے جائیں گے . اس حوالے سے وفاقی سیکریٹری صحت افتخار علی شلوانی کا کہنا ہے کہ پولیو خوفناک بیماری ہے جو بچوں کو تاعمر معذور بنا دیتی ہے .
اُنہوں نے مزید کہا ہے کہ بدقسمتی سے پولیو ہمارے بچوں کے لیے بدستور خطرہ ہے، حکومت پاکستان پولیوکے خاتمے کے لیے پُرعزم ہے . وفاقی سیکریٹری صحت افتخارعلی شلوانی نے یہ بھی کہا ہے کہ والدین پر بچوں کی صحت یقینی بنانے کے لیے بڑی ذمے داری ہے .