اسپیکر و ڈپٹی اسپیکر کے انتخاب کیلیے پختونخوا اسمبلی کا اجلاس، جے یو آئی کا بائیکاٹ

پشاور(قدرت روزنامہ) پختونخوا میں اسپیکر اور ڈپٹی اسپیکر کے انتخاب کے لیے صوبائی اسمبلی کا اجلاس مشتاق غنی کی صدارت میں شروع ہوگیا، تاہم جے یو آئی کی جانب سے انتخابی عمل کا بائیکاٹ کیا گیا ہے .
ایکسپریس نیوز کے مطابق اسپیکر کے لیے سنی اتحاد کونسل کے بابر سلیم سواتی کا مقابلہ اپوزیشن جماعتوں کے امیدوار پی پی پی کے احسان اللہ میاں خیل سے جب کہ ڈپٹی اسپیکر کے لیے سنی اتحاد کونسل کی ثریا بی بی کا مقابلہ اپوزیشن پی ٹی آئی پی کے امیدوار ارباب وسیم سے ہے .

آج اسپیکر اور ڈپٹی اسپیکر کے انتخاب کے عمل کا جے یو آئی (ف) کے ارکان اسمبلی نے بائیکاٹ کیا ہے . پختونخوا اسمبلی میں اپوزیشن لیڈر کے لیے مسلم لیگ ن کی جانب سے ڈاکٹر عباد اللہ کو نامزد کیا گیا ہے جب کہ وزیراعلیٰ کے منصب کے لیے انتخاب کل ہوگا، اس سلسلے میں پاکستان مسلم لیگ ن کی جانب سے ڈاکٹر ہشام انعام اللہ کو نامزد کیا گیا ہے جب کہ علی ا مین گنڈاپور آزاد حیثیت سے وزیراعلیٰ کا انتخاب لڑیں گے .
صوبائی اسمبلی میں اراکین کی تعداد 118 ہو گئی ہے، جس میں سنی اتحاد کونسل کے ارکان کی تعداد 87 جب کہ 6 ارکان آزاد حیثیت سے اسمبلی میں موجود ہیں . خیبر پختونخوا میں اپوزیشن جماعتوں کے ارکان کی تعداد 25ہے .