چئیرمین سینیٹ کو عہدے سے ہٹانے کیلیے لاہور ہائیکورٹ میں درخواست دائر

لاہور(قدرت روزنامہ) چئیرمین سینیٹ صادق سنجرانی کو عہدے سے ہٹانے کے لیے لاہور ہائیکورٹ میں درخواست دائر کر دی گئی۔درخواست مقامی شہری مشکور حسین نے ندیم سرور ایڈوکیٹ کے ذریعے دائر کی جس میں صادق سنجرانی اور الیکشن کمیشن سمیت دیگر کو فریق بنایا گیا۔
درخواست میں موقف اپنایا کہ صادق سنجرانی نے بلوچستان کی صوبائی اسمبلی کی نشست پر الیکشن لڑا اور کامیابی کے بعد الیکشن کمیشن نے نوٹیفکیشن بھی جاری کر دیا۔
درخواست گزار کے مطابق صادق سنجرانی بیک وقت دو سیٹیں نہیں رکھ سکتے اور غیر قانونی طور پر چیئرمین سینیٹ کے طور پر کام کر رہے ہیں۔
درخواست میں استدعا کی گئی کہ الیکشن کمیشن صادق سنجرانی کی بطور سینیٹر نشست خالی قرار دینے کا حکم دے اور لاہور ہائیکورٹ صادق سنجرانی کو بطور چیئرمین سینیٹ کام کرنے سے بھی روکے۔