چیف الیکشن کمشنر بار بار آئین توڑ رہے ہیں، علی امین گنڈاپور

پشاور(قدرت روزنامہ)وزیراعلیٰ خیبر پختونخوا علی امین گنڈاپور نے چیف جسٹس سے سائفر کے معاملے پر جوڈیشل کمیشن بنانے کا مطالبہ کردیا اور ساتھ میں یہ بھی کہا کہ چیف الیکشن کمشنر بار بار آئین توڑ رہے ہیں مگر کسی کو پرواہ نہیں، آئین توڑنے کے مرتکب افراد کو آرٹیکل 6 کے مطابق سزا دی جائے۔
پشاور میں جلسے سے خطاب کرتے ہوئے علی امین گنڈاپور کا کہنا تھا کہ قومی سلامتی کونسل نے مانا سائفر کا معاملہ مداخلت تھی۔انہوں نے کہا کہ وفاقی حکومت سے ڈی کلاسیفائیڈ ہونے کے بعد سائفر خفیہ نہیں رہا۔ ہمارے خلاف سازش کی گئی، ایک دن تمام سازشی بے نقاب ہوں گے۔
علی امین گنڈا پور کا کہنا تھا کہ سائفر پر چیف جسٹس پاکستان جلداز جلد جوڈیشل کمیشن بنائیں، فارم 45 کے مطابق ہمارے لوگ جیتے ہوئے ہیں اس پر بھی کمیشن بنایا جائے۔انہوں نے کہا کہ انتخابات میں د ھاندلی ہوئی، کمیشن بنا کر اسکی تحقیقات کی جائیں۔
وزیراعلیٰ خیبرپختونخوا کا کہنا تھا کہ ہماری مخصوص نشستیں کسی اور کو دینا غیرآئینی و غیرقانونی ہے۔ جب تک ہماری سیٹیں ہمیں نہیں دی جاتیں احتجاج جاری رہے گا۔ علی امین گنڈاپور نے کہا کہ کرپشن، ناانصافی اور ظلم کے خلاف جہاد کرنا ہے، ہم اپنا حق مانگتے رہیں گے، اس کےلیے آخری حد تک جائیں گے۔