پشاور ہائیکورٹ نے علی امین گنڈاپور کے اثاثہ جات سے متعلق الیکشن کمیشن کا نوٹس معطل کردیا

پشاور(قدرت روزنامہ)پشاور ہائیکورٹ نے وزیراعلیٰ خیبرپختونخوا علی امین گنڈاپور کے اثاثہ جات سے متعلق الیکشن کمیشن کا نوٹس معطل کردیا۔

نجی ٹی وی چینل جیو نیوز کے مطابق پشاور ہائیکورٹ میں علی امین گنڈاپور کے اثاثہ جات سے متعلق الیکشن کمیشن کے نوٹس کیخلاف کیس کی سماعت ہوئی، وکیل درخواست گزار نے کہاکہ کاغذات نامزدگی پر اعتراض کا ایک وقت ہوتا ہے،علی امین گنڈاپور پر اب اعتراض نہیں کیا جا سکتا،الیکشن کمیشن کے پاس علی امین گنڈا پور کیخلاف کارروائی کااختیار نہیں۔

جسٹس اعجاز انور نے کہاکہ الیکشن کمیشن نے ابھی تو صرف نوٹس جاری کیا ہے آرڈر تو نہیں ہے،عدالت نے کہاکہ سپریم کورٹ فیصلے کے تحت اب کسی ادارے کے پاس اختیار نہیں رہا کہ صادق امین کے سرٹیفکیٹ دے،پشاور ہائیکورٹ نے الیکشن کمیشن کا نوٹس معطل کردیااور فریقین کو نوٹس جاری کردیا۔

یاد رہے کہ علی امین گنڈا پور نے الیکشن کمیشن کی کارروائی کو پشاور ہائیکورٹ میں چیلنج کیا تھا۔