سائفر معاملے پر ڈونلڈ لو سچا ہے تو عمران خان پر مقدمہ جھوٹا ہے، بابراعوان

اسلام آباد(قدرت روزنامہ)پی ٹی آئی رہنما بابر اعوان نے کہا ہے کہ سائفر معاملے پر ڈونلڈ لو سچا ہے تو عمران خان پر مقدمہ جھوٹا ہے۔
امریکی نائب وزیر خارجہ ڈونلڈ لو کے کانگریس کمیٹی میں سائفر سے متعلق بیان پر پی ٹی آئی رہنما بابر اعوان نے ردعمل دیتے ہوئے کہا ہے کہ ڈونلڈ لو نے تو عمران خان کو سائفر کیس سے بری کرنے والا بیان دیا ہے۔ وہ کہتا ہے کہ سائفر ہے ہی کوئی نہیں، کیس فوری واپس لینا چاہیے۔
اسلام آباد ہائی کورٹ میں میڈیا کے نمائندوں سے گفتگو کرتے ہوئے بابراعوان کا کہنا تھا کہ اگر ڈونلڈ لو سچا ہے کہ سائفر ہے ہی نہیں تو پھر یہ مقدمہ جھوٹا ہے۔ شہباز شریف اور ان کی مینڈیٹ چور حکومت تو سیلوٹ مار گورنمنٹ ہے۔ یہ سب سے پہلے ڈونلڈ لو کو سیلوٹ مارتے ہیں۔
انہوں نے کہا کہ ڈونلڈ لو نے یہ بھی کہا کہ امریکا کی پوری کوشش ہو گی کہ پاک ایران گیس پائپ لائن نہ بنے۔ کیا یہ مداخلت نہیں ہے؟ شرم کریں جو لوگ کہتے ہیں کہ مداخلت نہیں ہے۔ عمران خان کا مؤقف درست ثابت ہو گیا، یہ موقف ڈونلڈ لو نے خود ثابت کیا ہے۔