یوٹیلٹی اسٹورز کارپوریشن نے 45 ہزار میٹرک ٹن چینی کی خریداری کا ٹینڈر منسوخ کردیا

اسلام آباد (قدرت روزنامہ)یوٹیلٹی اسٹورز کارپوریشن (یو ایس سی) نے مہنگی بولی کے باعث 45 ہزار میٹرک ٹن چینی کی خریداری کا ٹینڈر منسوخ کردیا ہے۔
ذرائع کا کہنا ہے کہ یوٹیلٹی اسٹورز کارپوریشن کی جانب سے رمضان کے دوران چینی کی ممکنہ قلت پر قابو پانے کیلئے 45 ہزار میٹرک ٹن چینی کی خریداری کا ٹینڈر جاری کیا گیا تھا تاہم مہنگی بولی کے باعث کارپوریشن نے ٹینڈر منسوخ کردیا-
ذرائع کے مطابق یو ایس سی کو کم سے کم بولی 142 روپے فی کلو کے حساب سے موصول ہوئی اور خریداری کی صورت میں اخراجات ملا کر فی کلو چینی 155 روپے میں پڑنی تھی لہٰذہ مہنگی بولی کے باعث ٹینڈر منسوخ کردیا گیا۔
یو ایس سی ذرائع نے دعویٰ کیا کہ کارپوریشن کے پاس چینی کا وافر ذخیرہ موجود ہے جو رمضان کی ضروریات پوری کرنے کیلئے کافی ہے۔
خیال رہے کہ اس وقت وزیراعظم کے رمضان ریلیف پیکیج کے تحت یوٹیلٹی اسٹورز پر چینی کی فی کلو قیمت بے نظیر انکم سپورٹ پروگرام کے مستحقین کیلئے 109 روپے اور عام صارفین کیلئے 155 روپے مقرر ہے۔