پی ٹی آئی کو جلسے کی اجازت کا معاملہ، اسلام آباد ہائیکورٹ کا فریقین کو نوٹس

اسلام آباد(قدرت روزنامہ) پی ٹی آئی کی وفاقی دارالحکومت میں جلسے کی اجازت کی درخواست پر اسلام آباد ہائی کورٹ نے فریقین کو نوٹسز جاری کر کے کل جواب طلب کر لیا۔
اسلام آباد ہائیکورٹ کے چیف جسٹس عامر فاروق نے کیس کی سماعت کی، پاکستان تحریک انصاف کے وکیل شیر افضل عدالت میں پیش ہوئے۔
وکیل شیر افضل مروت نے کہا کہ آئی جی اسلام آباد نے سیکیورٹی تھریٹس کو وجوہات بنایا ہے، جس پر چیف جسٹس عامر فاروق نے ریمارکس دیے کہ جو بھی آپشنز ہوں گے ان کو کل دیکھ لیں گے۔
اس سے قبل ہائیکورٹ نے ڈی سی کو پی ٹی آئی کی درخواست پر فیصلہ کرنے کی ہدایت کی تھی تاہم ڈی سی اسلام آباد نے سیکیورٹی وجوہات اور پولیس نفری کی کمی کی وجہ بتا کر درخواست مسترد کر دی تھی۔ عدالت نے کیس کی سماعت کل تک ملتوی کر دی۔