دبئی ، یوکرینی خاتون کا قبول اسلام کے چند گھنٹوں بعد انتقال ، جنازے میں کثیر تعداد میں لوگوں کی شرکت

اسلام آباد (قدرت روزنامہ)دبئی میں یوکرین سے تعلق رکھنے والی 29 سالہ خاتون دائرہ اسلام میں داخل ہونے کے چند گھنٹے بعد انتقال کر گئی۔ نماز جنازہ میں کثیر تعداد میں لوگوں نے شرکت کی ۔
بین الاقوامی میڈیا کے مطابق داریا کوٹسارینکو نامی یوکرینی خاتون بطورِ سیاح متحدہ عرب امارات آئی تھیں، اُنہوں نے یہاں سیاحت کے ساتھ ساتھ اپنے لیے نوکری بھی تلاش کرنا شروع کر دی تھی۔
یوکرینی خاتون کو ریاست میں نہ صرف بہترین کیریئر کے مواقع ملے بلکہ وہ دینِ اسلام کی خوبصورتی اور سادگی سے بھی بےحد متاثر ہوئیں اور اُنہوں نے 25 مارچ کو اسلام قبول کیا۔
رپورٹ میں بتایا گیا کہ اسلام قبول کرنے سے قبل داریا کوٹسارینکو کا تعلق مسیحی مذہب سے تھا ، انتقال کے وقت وہ روزے کی حالت میں تھیں، عرب میڈیا کے مطابق دائرہ اسلام میں داخل ہونے کے چند گھنٹے کے بعد ہی خاتون کو دل کا دورہ پڑا جس کی وجہ سے اُن کا انتقال ہو گیا۔