بیروزگار ہونیوالے سیاستدان اب احتجاجی تحریک کی قیادت کررہے ہیں، جان اچکزئی

کوئٹہ(قدرت روزنامہ)سابق وزیر اطلاعات جان اچکزئی نے کہا ہے کہ سردار اختر مینگل کو بلوچستان کے عوام نے مسترد کردیا ہے، اس لیے اب وہ عوام کے فیصلے کا ذمہ دار اسٹیبلشمنٹ کو ٹھہراتے ہیں۔ ایک پریس ریلیز میں اچکزئی نے کہا کہ بلوچستان نے انتخابات میں نفرت اور نسل پرستی کی سیاست کو مسترد کر دیا ہے۔انہوں نے اس بات پر زور دیا کہ اختر مینگل صرف ایک نشست کے ساتھ وفاقی حکومت یا بلوچستان کے پی ایس ڈی پی فنڈز سے ترقیاتی فنڈز حاصل نہیں کرسکتے۔جان اچکزئی نے کہا کہ بے روزگار ہونے کے بعد یہ سیاستدان اب احتجاجی تحریک کی قیادت کررہے ہیں۔ انہوں نے کہا کہ اختر مینگل کو چاہیے کہ وہ اپنے احتجاج کا رخ اپنے حلقوں کی طرف کریں جب لوگوں نے ان کی نفرت کی سیاست کو مسترد کردیا ہے۔ انہوں نے پیش گوئی کی کہ اگلے انتخابات میں وہ ایک سیٹ بھی نہیں جیت پائیں گے۔ اسٹیبلشمنٹ مخالف سیاست محض ایک چال ہے کیونکہ یہ سب اسٹیبلشمنٹ کی عدم دلچسپی کے باوجود اسٹیبلشمنٹ سے احسانات چاہتے ہیں۔