سبی ہرنائی ریلوے لائن کی بحالی کو جلد از جلد یقینی بنایا جائے،گورنر بلوچستان

اسلام آباد/کوئٹہ(قدرت روزنامہ) گورنر بلوچستان سید ظہور احمد آغا نے کہا ہے کہ سبی ہرنائی ریلوے لائن کی بحالی کو جلد از جلد یقینی بنایا جائے تاکہ جڑواں شہروں یعنی سبی اور ہرنائی کا ملک وصوبے کے دیگر علاقوں سے رابطے بحال ہونے کے علاوہ علاقے میں معاشی اور تجارتی سرگرمیوں کو فروغ مل سکیں انہوں نے کہا کہ صوبے کے دور افتادہ اضلاع کو ترقی دینے اور اجتماعی مسائل حل کرنے کے حوالے سے سبی ہرنائی ریلوے ٹریک کی بحالی کا کام یقیناً موجودہ حکومت کی عوام دوستی کا بڑا ثبوت ہے۔ یہ بات انہوں نے جمعرات کے روز اسلام آباد میں وفاقی وزیر ریلوے اعظم خان سواتی کے ساتھ ملاقات کے دوران گفتگو کرتے ہوئے کیا۔ اس موقع پر گورنر بلوچستان نے وزیر ریلوے کے فیصلے کو سراہتے ہوئے کہا کہ پاکستان ریلویز کے پاس بہت سی قیمتی پراپرٹی ہے ریلوے کی قیمتی اراضی لیزاوٹ (Lease out) کرنے کے تحت پاکستان ریلویز کے شاپنگ مال سینٹرز کی توسیع، بحالی اور اپ گریڈیشن مفاد خلق کے حق میں ایک دانشمندانہ فیصلہ ہے گورنر بلوچستان نے وفاقی وزیر برائے ریلوے اعظم خان سواتی کی توجہ کوئٹہ ٹو چمن ٹرین کی جانب مبذول کراتے ہوئے کہا کہ ضلع قلعہ عبداللہ اور ضلع پشین کے عوام کو ریلوے کی آرام دہ سفری سہولیات فراہم کرنا اشد ضروری ہے کوئٹہ ٹو چمن ٹرین کو روزانہ کی بنیاد پر چلانے سے ریلوے ایک منافع بخش ادارہ بن سکتا ہے گورنر بلوچستان نے کہا کہ یہ ہماری خوش قسمتی ہے کہ ہمارا صوبہ سینٹرل ایشیا تک راستہ فراہم کر سکتا ہے لہٰذا مستقبل کی ضروریات کو مدنظر رکھ کر نئی منصوبہ بندی کی جائے گورنر بلوچستان نے وفاقی وزیر ریلوے اعظم خان سواتی کی بلوچستان میں ریلوے کی توسیع، بحالی اور اپ گریڈیشن کے حوالے سے کی گئیں کاوشوں کو لائقِ تحسین قرار دیا۔