’جان ہے تو جہان ہے‘ وسیم اکرم کا میلبرن سے خصوصی پیغام

اسلام آباد (قدرت روزنامہ)پاکستان کرکٹ ٹیم کے سابق کپتان اور مایہ ناز فاسٹ بولر وسیم اکرم نے پاکستان میں ذیابیطس کے مریضوں کی بڑھتی ہوئی تعداد پرتشویش کا اظہار کرتے ہوئے اس کی روک تھام کے لیے سنجیدہ کوششوں پر زور دیا ہے۔
فوٹو اور ویڈیو شیئرنگ ایپ انسٹا گرام پر ویڈیو شیئر کرتے ہوئے وسیم اکرم نے کہا کہ میلبرن میں اس وقت صبح کے 7 بجے ہیں، موسم بہت خوشگوار ہے اور میں نے بہت ضروری سمجھا کہ اپنی پاکستانی عوام کے لیے ایک ویڈیو بنائی جائے۔
میلبرن سے دیے گئے اپنے پیغام میں وسیم اکرم کا کہنا تھا کہ میں پچھلے 4 سال سے رو رہا ہوں کہ ذیابیطس کو کنٹرول کرلیں، اپنا لائف اسٹائل تبدیل کریں۔ اب اعدادوشمار کے مطابق ذیابیطس سے متاثرہ ممالک کی فہرست میں پاکستان نمبر ون پر آگیا ہے جس میں ٹائپ 2 ذیابطیس کی قسم سب سے زیادہ ہے جس کا تعلق لائف اسٹائل سے ہے جیسے لیٹ کھانا، لیٹ اٹھنا، ورزش نہ کرنا۔
ان کا کہنا تھا کہ میری آپ سے درخواست ہے کہ اگر آپ کی عمر 25 سال سے زائد ہے تو اپنا ٹیسٹ کروا لیں تاکہ پتہ چل جائے کہ آپ کو ذیابیطس ہے یا نہیں۔ کیونکہ مسئلہ یہ ہے کہ ذیابیطس کی اس قسم میں درد نہیں ہوتا اور جب درد ہوتا ہے تو بہت دیر ہو چکی ہوتی ہے۔
وسیم اکرم نے کہا کہ مجھے ذیابیطس کے مرض کے ساتھ 25 سال ہوگئے ہیں لیکن احتیاط اور پرہیز نے میری زندگی بنائی ہوئی ہے دنیا کے کام تو چلتے ہیں لیکن جان ہے تو جہان ہے۔
ان کا کہنا تھا کہ ویڈیو پیغام دیکھنے کے بعد آدھے لوگ کہہ رہے ہوں گے کہ آپ نے داڑھی کیوں رکھی ہے آپ کی داڑھی سفید ہے، آپ نے عینک کیوں لگائی ہوئی ہے، ان چیزوں کے بجائے پیغام پر فوکس کریں، انہوں نے مزید کہا کہ میں چاہتا ہوں کہ آپ صحت مند زندگی گزاریں اور اپنے خاندان کے ساتھ لطف اندوز ہوں، ساتھ ہی انہوں نے ناظرین کا شکریہ ادا کرتے ہوئے کہا کہ اب سب الٹے سیدھے سوالات کر لینا۔