9 مئی کے ذمے دار آج ملکی مفاد پر حملہ کر رہے ہیں، وزیراطلاعات

اسلام آباد(قدرت روزنامہ) وزیراطلاعات عطا اللہ تارڑ نے کہا ہے کہ 9 مئی واقعات کے ذمہ دار آج ملکی مفاد پر حملہ آور ہیں . اسلام آباد میں میڈیا سے گفتگو کرتے ہوئے وزیراطلاعات عطا اللہ تارڑ کا کہنا تھا کہ ملک کے مفاد کے خلاف بات کرنے والا پاکستان کا دشمن ہے .

اپنے سیاسی مفاد اور انا کو ملکی مفاد پر ترجیح دینا قابل مذمت اور افسوسناک ہے .
انہوں نے کہا کہ تحریک انصاف نے پہلے ملکی مفاد کے خلاف بیان دیا پھر اس سے لاتعلقی کا اظہار کیا . یہ پی ٹی آئی کا پرانا وطیرہ ہے . ان کا لیڈر کرپشن کے مقدمات بھگت رہا ہے . ملک میں سرمایہ کاری پاکستان دشمنوں کو ہضم نہیں ہو رہی . ایسے عناصر کے لیے ہدایت کی دعا کرتے ہیں .
عطا اللہ تارڑ نے مزید کہا کہ کاش یہ ملک کے مفاد میں بھی بات کر سکیں . سیاسی مخالفت میں ملک دشمنی نامناسب ہے . آپ ہم پر تنقید کریں لیکن پاکستان پر تنقید ناقابل برداشت ہے . ہمارے دوست ممالک پاکستان میں سرمایہ کاری و تعاون کی حمایت اور دوستی کا ہاتھ بڑھا رہے ہیں . پاکستان انشاءاللہ ترقی کرے گا . دوست ممالک کے ساتھ روابط بڑھائیں گے .