پنجاب حکومت کا مرغی مافیا کے خلاف کریک ڈاؤن، اسٹیک ہولڈرز سے جواب طلب

لاہور (قدرت روزنامہ)محکمہ لائیو سٹاک پنجاب نے کہا ہے کہ مرغی کی قیمتیں باقاعدہ گٹھ جوڑ کرکے بڑھائی جاتی ہیں . حکام محکمہ لائیو سٹاک نے پولٹری فارمرز اور ٹریڈرز کے خلاف کارروائی کا آغاز کر دیا ہے .

وزیراعلیٰ پنجاب مریم نواز نے مافیا کے گٹھ جوڑ کا سخت نوٹس لیا ہے .
حکام محکمہ لائیو سٹاک کا کہنا ہے کہ عوام کو سستا چکن فراہم کرنا حکومت کی اولین ترجیح ہے، پولٹری فارمرز اور ٹریڈرز سے سٹاکس کا ڈیٹا منگوا لیا گیا ہے . مرغی مافیا ملی بھگت سے واٹس ایپ گروپس پر ریٹ نکالتے ہیں . پچھلے چند روز میں مرغی کی فی کلو قیمت میں 200 روپے تک اضافہ کیا گیا ہے .

ذرائع کا کہنا ہے کہ کمپیٹیشن کمیشن آف پاکستان نے بھی مرغی کی قیمتوں میں اضافے کا نوٹس لے لیا ہے اور تمام اسٹیک ہولڈرز سے جواب طلب کرلیا ہے . واضح رہے کہ زندہ مرغی 560 سے 580 روپے کلو فروخت کی جا رہی ہے .