وزیراعلیٰ کی کر سی تک پہنچنے کیلئے آگ کا دریا عبور کرنا پڑا : مریم نواز

لاہور (قدرت روزنامہ)وزیراعلیٰ پنجاب مریم نواز وردی پہنے پولیس ٹریننگ سینٹر کالج چوہنگ پہنچیں جہاں انہوں نے پاس آؤٹ ہونے والی خواتین پولیس اہلکاروں کو مبارکباد دی اور ان سے خطاب کرتے ہوئے کہا کہ پاسنگ آؤٹ پریڈ میں شرکت کرنا ان کے لیے باعث فخر ہے، پولیس کےشعبے میں خواتین کی تعداد بڑھا کر نصف کرنا چاہتے ہیں۔

وزیر اعلیٰ پنجاب مریم نواز نے پولیس ٹریننگ کالج چوہنگ میں پاسنگ آؤٹ پریڈ میں تقریب سے خطاب کرتے ہوئے کہا کہ خواتین پولیس اہلکاروں کو چوکس دیکھ کر بڑی خوشی ہوئی۔ پاسنگ آؤٹ پریڈ میں شرکت میرے لیے باعث فخر ہے۔ انسپکٹر جنرل پنجاب کو کہا کہ 7 ہزار کا نمبر بہت کم ہے اس کو بڑھانا چاہیے، خواتین سپر ہیومنز ہیں۔انہوں نے کہا کہ میں نے زندگی میں پہلی بار پولیس کا یونیفارم پہنا ہے جسے پہن کر مجھے یہ احساس ہوا کہ یہ بہت بڑی ذمہ داری ہے، اور مجھے معلوم ہے آپ بھی جانتے ہیں کہ یہ کتنی بڑی ذمہ داری ہے۔

مریم نواز کا کہنا تھا کہ وزیر اعلیٰ بننا آسان نہیں ہے، یہ کرسی اللہ نے مجھے دی ہے، یہاں تک پہنچنے کے لیے مجھے آگ کا دریا عبور کرکے آنا پڑا ہے۔ جب گھر جاتی ہوں ابو مجھے دیکھ کر بہت خوش ہوتے ہیں۔ان کا کہنا تھا کہ میں 3 بار وزیر اعظم رہنے والے نواز شریف کی بیٹی تھی مگر مجھے بھی خود کو ثابت کرنا پڑا، مجھے آگ کے دریا سے گزرنا پڑا اور اچھا ہوا میری ٹریننگ ہوئی، کوئی اب نہیں کہہ سکتا کہ وہ یہاں اس لیے بیٹھی ہے کہ اس کا باپ وزیر اعظم تھا۔

مریم نواز نے کہا کہ ہم تو صرف فیصلے کرتے ہیں آپ لوگ اس پر عمل درآمد کرتے ہیں، آپ سے یہی درخواست کروں گی کہ لوگوں کے ساتھ انصاف والا معاملہ کریں، جس معاشرے میں انصاف نہیں ہوتا وہ خراب ہو جاتے ہیں، آپ لوگ انصاف کریں گے اور مظلوم کا ساتھ دیں گے تو معاشرے میں بہتری آئے گی۔

انہوں نے کہا کہ میں آپ سب کو سلام پیش کرتی ہوں، مجھے خوشی ہوئی کہ پہلی سوارڈ آف آنر ایک خواتین پولیس افسر کو ملی، مجھے آپ سب پر فخر ہے، جب سے میں نے وزیر اعلی کا حلف لیا تب سے میں اس تقریب کا انتظار کر رہی تھی۔ان کا مزید کہنا تھا کہ آئی جی صاحب سے ہر روز ہی پوچھتی تھی کہ یہ تقریب کب ہونی ہے، مجھے شرکت کرنے کا بہت شوق تھا۔ آخر کار اللہ نے مجھے موقع دے دیا کہ میں آپ لوگوں کے ساتھ یہاں موجود ہوں، کسی بھی قسم کی مدد درکار ہو تو میں ہر وقت آپ کے لیے حاضر ہوں۔