وزیر داخلہ نے شادی شدہ خواتین کے پاسپورٹ کے مسائل کا نوٹس لے لیا
اسلام آباد (قدرت روزنامہ)وفاقی وزیر داخلہ محسن نقوی نے شادی شدہ خواتین کے پاسپورٹ کے مسائل کا نوٹس لیتے ہوئے معاملے کے حل کے لیے وفاقی سیکرٹری داخلہ خرم علی آغا کی سربراہی میں ایک کمیٹی تشکیل دی، جو پاسپورٹ پر شادی شدہ خاتون کے والد یا شوہر کا نام شامل کرنے کے معاملے پر غور کرے گی اور قابل عمل حل تلاش کرے گی۔
وزیر داخلہ محسن نقوی نے معاملے کو حل کرنے کے لیے وفاقی سیکرٹری داخلہ خرم علی آغا کی سربراہی میں ایک کمیٹی تشکیل دی۔ انہوں نے ایک عملی حل کی ضرورت پر زور دیا اور کمیٹی کو ہدایت دی کہ وہ تمام مسائل کا جائزہ لے اور ایسی سفارشات فراہم کرے جو شادی شدہ خواتین کی سہولت کو ترجیح دیں۔
انہوں نے یقین دلایا کہ قواعد و ضوابط کے دائرہ کار میں اس مسئلے کو فوری طور پر حل کرنے کی کوششیں جاری ہیں۔ یہ معاملہ نجی ٹی وی کے ایک پروگرام کے دوران اس وقت زیر بحث آیا، جب وکیل خدیجہ بخاری، اور لاہور ہائیکورٹ کے ایک مقدمے میں درخواست گزار نے اس معاملے پر بات کی۔
یہ ان خواتین کے لیے ہے جو اپنی ازدواجی حیثیت سے قطع نظر ہوکر اپنے والد کا نام اپنے نام کے ساتھ برقرار رکھنا چاہتی ہیں، اس مسئلے نے حکومتی اداروں کی طرف سے خواتین کے خلاف ممکنہ امتیازی سلوک کے بارے میں ایک نئی بحث کو جنم دیا ہے۔
خاص طور پر طلاق کے بعد بھی اکثر عورت کی شناخت کو اس کے سابقہ شوہر سے جوڑا جاتا ہے، جبکہ وہ اس بات کو ترجیح نہیں دے رہی ہوتی ہے۔ اسی سلسلے میں وزیر داخلہ محسن نقوی نے کہا کہ پوری کوشش ہے کہ اس مسئلے کا قواعد و ضوابط کے تحت فوری حل نکالا جائے۔
