وزیراعظم شہباز شریف نے غیر اعلانیہ لوڈشیڈنگ ختم کرنے کا حکم دے دیا

وزارت پانی و بجلی کی جانب سے شہباز شریف کو بریفنگ دی جائے گی
اسلام آباد (قدرت روزنامہ)وزیراعظم شہباز شریف نے ملک میں طویل لوڈشیڈنگ اور بجلی کی طلب و رسد کے حوالے سے اجلاس میں غیر اعلانیہ لوڈشیڈنگ ختم کرنے کا حکم دے دیا۔اجلاس میں وزارت پانی و بجلی کی جانب سے وزیراعظم کو بریفنگ دی گئی۔ دوران اجلاس وزیر اعلی خیبرپختونخوا علی امین گنڈاپور کو بھی بریف کیا گیا۔ علاوہ ازیں وزیراعلی خیبرپختونخوا نے بجلی چوری کم کرنے کی یقین دہانی کروائی ہے۔
واضح رہے کہ ملک بھر میں غیراعلانیہ طویل لوڈشیڈنگ کے باعث کئی مقامات پر احتجاج جاری ہے ہیں۔ کئی مقامات پر 6 گھنٹے تک بجلی کی لوڈشیڈنگ ہے اور لائن لاسز والے علاقوں میں 14 گھنٹے تک کی لوڈشیڈنگ کی جارہی ہے، اب تفصیلات منظر عام پر آئی ہیں کہ ملک بھر میں بجلی کا شارٹ فال 5ہزار319میگاواٹ تک پہنچ گیا جبکہ بجلی کی طلب 25 ہزار میگاواٹ ہے۔
لوڈ شیڈنگ، بجلی کی طلب ور سد سے متعلق اجلاس آج طلب کیا گیا جس کی صدارت وزیراعظم شہباز شریف نے کی۔ادھر پشاور میں بجلی لوڈشیڈنگ کے خلاف جاری احتجاج کے دوران مظاہرین نے پشاورایم ون سے چارسدہ تک موٹروے کو بند کردیا۔ بجلی لوڈ شیڈنگ کے خلاف شہری سڑکوں پر نکل آئے اور اکبر پورہ اور قریبی دیہات کے شہریوں نے موٹروے کو احتجاجاً بند کردیا۔
مظاہرین نے کہا کہ اکبر پورہ اور ملحقہ علاقوں میں 12 سے 16 گھنٹے لوڈ شیڈنگ کی جارہی ہے، جب تک غیر اعلانیہ لوڈ شیڈنگ کم کرنے کی یقین دہانی نہ کرائی گئی احتجاج ختم نہیں کرینگے۔