اے سی کا جادو، چوری بھول کر جائے واردات پر سوجانے والے چور کو پولیس نے جگایا

اسلام آباد (قدرت روزنامہ)دنیا بھر میں چوری کےمختلف واقعات کے بارے میں آپ نے یقینا سنا ہو گا لیکن بھارت میں ایسا دلچسپ واقعہ پیش آیا جو سن کر آپ بھی دنگ رہ جائیں گے۔
لکھنؤ پولیس کے مطابق ملزم نشے میں دھت تھا جب وہ گھر میں داخل ہوا تو اس نے ایئر کنڈیشنر چلا دیا اور اس کے بعد پھر کیا ہونا تھا یہ چور نیند کی وادیوں میں کھو گیا۔
مذکورہ گھر کے مالک اپنی پوسٹنگ کے باعث شہر سے باہر تھے، گھر کو خالی دیکھ کر ملزم نے داخلی دروازہ توڑا اور اندر داخل ہوگیا۔ جب وہ ڈرائنگ روم میں پہنچا تو اسے ایئر کنڈیشنرنظر آیا جو اس نے آن کردیا۔ ٹھنڈی ہوا کے جھونکے ملنے پر چور بڑے آرام سے سر کے نیچے تکیہ رکھ کر زمین پر سو گیا۔
مکان کا دروازہ کھلا دیکھ کر پڑوسی نے گھر کے مالک کو فون کیا جو اس وقت لکھنؤ میں موجود نہیں تھے جس کے بعد انہوں نے پولیس کو اطلاع دی۔
پولیس نے مذکورہ شخص کو بڑے مزے سے اے سی کی ہوا لیتے ہوئے سوتا پایا جو ہاتھ میں موبائل تھامے گہری نیند میں تھا۔
پولیس افسر نے بتایا کہ ملزم گھر میں چوری کی نیت سے گھسا تھا لیکن ایئرکنڈیشنر دیکھ کر سو گیا۔ انہوں نے مزید کہا کہ ملزم نے خاصی شراب پی رکھی تھی جس کی وجہ سے اس کی آنکھ نہیں کھلی اور پڑوسی کی اطلاع پر ہم نے اسے گرفتار کرلیا۔