پاک بھارت ہائی وولٹیج ٹاکرا، تاریخ کیا کہتی ہے، کیا گرین شرٹس پھر اگر مگر کے گھن چکر میں چلے جائیں گے؟
پاک بھارت ٹاکرا آئی سی سی کے لیے بھی فائدہ مند انٹرنیشنل کرکٹ کونسل (آئی سی سی) سب سے زیادہ پیسہ بھی پاکستان اور بھارت کے درمیان ہونے والے میچز سے کماتی ہے، یہی وجہ ہے کہ آئی سی سی نے شائقین کی دلچسپی کو دیکھتے ہوئے پاکستان اور بھارت دونوں کو ایک ہی گروپ (اے) میں رکھا ہے . انٹرنیشنل کرکٹ کونسل (آئی سی سی ) کی آفیشل ویب سائٹ پربتایا گیا ہے کہ دونوں ممالک کے درمیان اس ہائی وولٹیج ٹاکرے کو دیکھنے کے لیے 300 سے 400 ڈالرتک کے ٹکٹ فروخت ہوچکے ہیں جب کہ اب بھی ڈائمنڈ کلب، کاباناس، کارنر کلب اور پریمیم کلب لاؤنج نارتھ میں ٹکٹ دستیاب ہیں . کہا جا رہا ہے کہ ڈائمنڈ کلب میں ٹکٹ سب سے زیادہ مہنگے ہیں کیونکہ ان کی قیمت 10،000 ڈالر ہے جب کہ دوسرے اسٹینڈز کے ٹکٹ 2،500 ڈالر سے 3،000 ڈالر کے درمیان قیمت پردستیاب ہیں . شائقین آئی سی سی کی آفیشل ویب سائٹ پرمیچ کے ٹکٹ خرید سکتے ہیں جس کے ہوم پیج پر ٹکٹنگ ٹیب لگا ہوا ہے . 34 ہزار شائقین کی گنجائش والا اسٹیڈیم بھر جانے کا امکان ناساؤ کاؤنٹی انٹرنیشنل کرکٹ اسٹیڈیم میں 34 ہزار تماشائیوں کی گنجائش ہے اوراتوار کے روز اس ہائی وولٹیج ٹاکرے کو دیکھنے کے لیے اس گراؤنڈ کے مکمل بھر جانے کا امکان ہے . جمعرات کو امریکا کے ہاتھوں حیران کن اَپ سیٹ شکست کے بعد پاکستان کو بھارت کے خلاف میچ ہر حال میں جیتنا ہو گا، نہیں تو پاکستان ہمیشہ کی طرح ’اگر مگر‘ کے گھن چکر میں چلا جائے گا . پاکستان کے خلاف میچ جیتنے کی صورت میں بھارت سپر 8 مرحلے کے لیے ایک قدم آگے چلا جائے گا کیونکہ وہ پہلے ہی آئر لینڈ کے خلاف اپنا پہلا میچ جیت چکا ہے . پاک بھارت ہائی وولٹیج ٹاکرے میں پاکستان کی قیادت بابر اعظم جبکہ بھارت کی قیادت روہت شرما کریں گے . پاک بھارت ہائی وولٹیج میچ میں فیورٹ کون ہے؟ بھارت اور پاکستان ٹی20 ورلڈ کپ میں اب تک 7 مرتبہ آمنے سامنے آچکے ہیں جہاں بھارت نے 5 میچ جیتے جبکہ پاکستان نے صرف ایک میچ جیتا ہے . بقیہ ایک ٹی20 میچ میں بھارت نے باؤل آؤٹ کے ذریعے جیت حاصل کر رکھی ہے . اگر ٹریک ریکارڈ کو دیکھا جائے تو بھارت اس میچ میں بھی فیورٹ ہے . دوسری جانب بھارت گروپ اے کے میچ میں آئرلینڈ کے خلاف آسان فتح کے بعد میدان میں اتر رہا ہے جبکہ پاکستان پہلے میچ میں شریک میزبان امریکا کے ہاتھوں حیران کن شکست کے بعد دباؤ میں ہے . واضح رہے کہ پاکستان نے بھارت کے خلاف ورلڈ کپ میں واحد ٹی20 میچ 2021 میں جیتا تھا جب بابر اعظم الیون نے ویرات کوہلی کی قیادت والی ٹیم کو شکست سے دوچار کیا تھا . پاکستان اور بھارت کے درمیان میچ کب کھیلا جائے گا؟ یہ میچ مقامی وقت کے مطابق صبح 10:30 بجے (14:30 جی ایم ٹی) شروع ہوگا جب کہ بھارت اور پاکستان میں ناظرین کے لیے یہ بالترتیب رات 8 اور شام 7:30 بجے شروع ہوگا . نیو یارک کی پچ کیسی ہے؟ ناساؤ کاؤنٹی انٹرنیشنل کرکٹ اسٹیڈیم میں اب تک 3 میچز کھیلے جا چکے ہیں . پہلے 2 میچز میں اس پچ پر انتہائی کم اسکور بنے اور یہ فاسٹ بولرز کے لیے انتہائی فائدہ مند رہی . بلے بازوں کو گیند کے باؤنس ہونے کی وجہ سے بڑے شاٹس مارنے میں دشواری کا سامنا رہا . شائقین اور سابق کھلاڑیوں کی جانب سے تنقید کے بعد انٹرنیشنل کرکٹ کونسل (آئی سی سی) نے کہا ہے کہ پچز معیار کے مطابق نہیں ہیں اور گراؤنڈ اسٹاف باقی ٹورنامنٹ کے لیے ان کی مرمت پر کام کر رہا ہے . آئرلینڈ اور کینیڈا کے درمیان کھیلے گئے تیسرے میچ میں دونوں ٹیموں نے 100 سے زیادہ کا اسکور بنایا لیکن پچ انتہائی مشکل رہی ہے . کیا ہندوستان بمقابلہ پاکستان کے لیے کوئی سیکیورٹی خدشات ہیں؟ ریاست نیو یارک کی گورنر کیتھی ہوچل نے گزشتہ ہفتے کہا تھا کہ ٹورنامنٹ کے لیے نیو یارک میں خاص طور پر بھارت اور پاکستان کے درمیان میچ سے قبل سیکیورٹی انتظامات کو ‘سخت’ کیا جائے گا . پاک بھارت میچ میں امریکی صدر کو دی جانے والی سیکیورٹی سے زیادہ انتظامات ناساؤ کاؤنٹی کے پولیس کمشنر پیٹرک رائیڈر نے کہا ہے کہ وہ میچ کو ہلکا نہیں لے رہے کیوں کہ جب شائقین کی دلچسپی کی بات آتی ہے تو اسے ہم ’سپر باؤل آن اسٹیرائڈز‘ کی طرح سمجھتے ہیں . رائیڈر نے صحافیوں کو بتایا کہ میچ کے لیے سیکیورٹی ممکنہ طور پر اس سے زیادہ ہے جو ہم صدر کو پیش کرتے ہیں . نیو یارک میچ کی تیاری کیسے کر رہا ہے؟ آئی سی سی نے ان شائقین کے لیے آفیشل فین پارکس کا انتظام کیا ہے جو میچ دیکھنے گراؤنڈ میں نہیں جا سکتے . نیو یارک میں بھارت اور پاکستان کے درمیان میچ اوکلس ورلڈ ٹریڈ سینٹر اور سیڈر کریک پارک میں شائقین کے لیے براہ راست نشر کیا جائے گا . ٹیکساس کے ایپک سینٹر اور سیئٹل سینٹر میں فشر پویلین میں بھی فین پارکس کا اہتمام کیا گیا ہے . امریکا کے علاوہ آئی سی سی نے نئی دہلی، بھارت اور راولپنڈی، پاکستان اور برطانیہ اور جنوبی افریقا میں بھی فین پارکس کا اہتمام کیا ہے . نیویارک کا موسم کیسا رہے گا؟ صبح کے وقت بارش کی پیش گوئی کی گئی ہے ، جس سے میچ میں خلل پڑ سکتا ہے . اگر بارش ٹی20 ورلڈ کپ کے میچ میں خلل ڈالتی ہے تو کیا ہوگا؟ خراب موسمی حالات یا دیگر رکاوٹوں کی صورت میں، صبح اور دوپہر کے تمام میچوں کے لیے اضافی 90 منٹ اور شام کے تمام میچوں کے لیے 60 منٹ مختص کیے گئے ہیں . مختصر میچ کی صورت میں ہر ٹیم کو نتائج کے اعلان کے لیے 5 اوورز مکمل کرنے ہوں گے . گروپ مرحلے کے مقابلوں کے لیے کوئی ریزرو دن نہیں ہے . اگر بھارت اور پاکستان کا میچ برابر ہو جائے تو کیا ہوگا؟ تمام ٹائی میچز سپر اوور تک جائیں گے اور اگر سپر اوور میں بھی میچ برابر ہو جاتا ہے، تو پھر سپر اوورز دیا جائے گا اور یہ سپر اوورز اس وقت تک کھیلے جائیں گے جب تک کہ فاتح سامنے نہیں آ جاتا . پاک بھارت ٹاکرا، ٹی20 ورلڈ کپ کی تاریخ کیا کہتی ہے؟ جوہانسبرگ 2007ء ( گروپ میچ) : بھارت نے دونوں اننگز کے اختتام پر میچ برابر ہونے کے بعد پاکستان کو باؤل آؤٹ میں شکست دی . جوہانسبرگ: بھارت نے فائنل میں پاکستان کو 5 رنز سے شکست دے کر پہلا ٹی20 ورلڈ کپ جیتا . ناتجربہ کار جوگندر شرما نے آخری اوور میں شاندار بولنگ کی جبکہ عرفان پٹھان اور آر پی سنگھ نے بھی اہم کردار ادا کیا اور 3، 3وکٹیں حاصل کیں . کولمبو: بھارت نے گروپ مرحلے میں پاکستان کو 8 وکٹوں سے شکست دی اور پاکستان کو صرف 128 رنز پر ڈھیر کر دیا جس میں لکشمی پتی بالاجی نے 3 وکٹیں حاصل کیں . ویرات کوہلی کی عمر اس وقت 22 سال تھی اور انہوں نے ناقابل شکست 78 رنز بنائے . میرپور2014 کا ورلڈ کپ: بھارت نے گروپ مرحلے میں پاکستان کو 7 وکٹوں سے شکست دی . ویرات کوہلی اور سریش رائنا کی ناقابل شکست 66 رنز کی شراکت نے بھارت کو فتح دلائی . 2016 کا ورلڈ کپ : بارش سے متاثرہ مقابلے میں بھارت کے گیند بازوں نے پاکستان کو 5 وکٹوں کے نقصان پر 118 رنز تک محدود کر دیا جس کے بعد کوہلی نے ناقابل شکست 55 رنز کی اننگز کھیل کر بھارت کو گروپ میچ 6 وکٹوں سے جیت لیا . دبئی میں 2021میں پاکستان نے پہلی بار بھارت کو گروپ میچ میں 10 وکٹوں سے شکست دی . شاہین شاہ آفریدی اور حسن علی نے 5 وکٹیں حاصل کرکے بھارت کو 7 وکٹوں کے نقصان پر 151 رنز تک محدود رکھا جبکہ محمد رضوان نے ناٹ آؤٹ 79 اور بابر اعظم ناٹ آؤٹ 68 رنز کی تاریخی اننگز کھیل کر پاکستان کو فتح دلائی . میلبورن میں بھارت نے ورلڈ کپ کے گروپ میچ میں پاکستان کو 4 وکٹوں سے شکست دی، جس میں کوہلی نے سنسنی خیز اختتام پر ناقابل شکست 82 رنز بنائے . . .
