اسلام آباد پولیس اور کارلفٹر گینگ میں فائرنگ کا تبادلہ، اپنے ہی ساتھیوں کا نشانہ بننے والے 3 ملزمان ہلاک
اسلام آباد پولیس پچھلے 2 ماہ سے اس خطرناک گینگ کے تعاقب میں تھی .
ترجمان اسلام آباد پولیس کے مطابق سیف سٹی کیمروں اور انسانی ذرائع سے اس گینگ کی معلومات اکٹھی کی گئی تھیں . گینگ کی آمد و رفت کے حوالے سے ایک روٹ بنایا گیا تھا . ذرائع نے پولیس کو اطلاع دی تھی کہ یہ گینگ مری کے طرف نکلا ہے .
اطلاع پر اے وی ایل سی، سی آر ٹی اور اے ٹی ایس کی ٹیموں نے مختلف علاقوں میں خصوصی ناکے قائم کیے . آج صبح کشمیر چوک ناکے پر موجود پولیس ٹیموں نے مری روڈ سے آتی ان کی گاڑیوں کو روکنے کی کوشش کی . ملزمان 2 گاڑیوں میں سوار تھے جن میں ایک جی ایل آئی اور دوسری ہنڈا سوک گاڑی تھی .
گاڑیوں میں موجود گینگ ممبران نے اچانک پولیس ٹیموں پر فائرنگ شروع کردی . جی ایل آئی کار سواروں کی فائرنگ سے ان کے اپنے 3 ساتھی ملزمان ہلاک ہوگئے . فائرنگ میں ایک عورت بھی زخمی ہوئی جبکہ جی ایل آئی گاڑی سے فائرنگ کرنے والے ملزمان فرار ہوگئے .
ڈیڈ باڈیز اور زخمی کو فوری اسپتال منتقل کیا گیا . ڈیڈ باڈیز کی شناخت الیاس خان سکنہ چارسدہ، وقاص خان سکنہ چارسدہ ہوئی، ایک ڈیڈ باڈی کی شناخت نہیں ہو سکی . زخمی عورت کی شناخت حسیبہ امجد کے نام سے ہوئی ہے .
ہلاک ملزم الیاس خان خطرناک کار لفٹر گینگ کا سرغنہ جبکہ باقی گینگ ممبر ہیں . ملزمان نے رات کو مری سے گاڑی چوری کی اور فرار ہو رہے تھے . دوسری گاڑی ہنڈا سوک بھی لاہور سے چھینی گئی تھی . ہنڈا سوک کار سے متعدد غیر نمونہ نمبر پلیٹس، جیمر، موبالئزر، اگنیشن بریکر، ایس ایم جی گن اور پسٹلز برآمد ہوئی .
پولیس کی بھاری نفری موقع پر پہنچ گئی تھی . فرار ملزمان کی گرفتاری کے لیے مختلف ٹیمیں روانہ کردی گئی ہیں . ملزمان متعدد مقدمات میں پولیس کو مطلوب تھے . . .
