9 مئی مقدمات میں ضمانت منسوخی، عمران خان نے فیصلہ ہائیکورٹ میں چیلنج کردیا

اسلام آباد (قدرت روزنامہ)پاکستان تحریک انصاف (پی ٹی آئی) کے بانی عمران خان نے 9 مئی کے 3 مقدمات میں عبوری ضمانتیں خارج کرنے کا اقدام لاہورہائیکورٹ میں چیلنج کردیا۔
لاہورہائیکورٹ میں عبوری ضمانتیں خارج ہونے کے خلاف درخواستیں بانی پی ٹی آئی کے وکیل بیرسٹر سلمان صفدر نے دائر کیں۔
درخواستوں میں مؤقف اختیار کیا گیا ہے کہ 9 مئی کے جلاؤ گھیراؤ کے تین مقدمات میں ٹرائل کورٹ نے حقائق کے منافی ضمانتیں مسترد کیں، ہائیکورٹ عبوری ضمانتیں خارج کرنے کا فیصلہ کالعدم قرار دے۔
خیال رہے کہ 9 جولائی کو لاہور کی انسداد دہشت گردی عدالت نے پاکستان تحریک انصاف (پی ٹی آئی) کے بانی اور سابق وزیراعظم عمران خان کی 9 مئی کے تین مقدمات میں عبوری ضمانت خارج کر دی تھی۔
لاہور کی انسداد دہشت گردی عدالت نے 9 مئی کو جناح ہاؤس، عسکری ٹاور، تھانہ شادمان جلاؤ گھیراؤ کے مقدمات میں عبوری ضمانت مسترد کی تھی۔