الیکشن کمیشن نے ووٹر لسٹوں کی درستگی کیلئے اہم ترین فیصلہ کرلیا

اسلام آباد (قدرت روزنامہ) الیکشن کمشن آف پاکستان نے ووٹر لسٹوں میں بے ضابطگیوں کےانکشافات کے بعد ووٹر لسٹوں کی درستگی کیلئے اہم ترین فیصلہ ، اب ووٹر لسٹوں کی درستگی کیلئے گھر گھر جا کر تصدیقی مہم شروع کی جائے گی ۔
نجی ٹی وی دنیا نیوز نے ذرائع کے حوالے سے بتایا کہ الیکشن کمیشن نے ووٹر لسٹوں میں بے ضابطگیوں کا نوٹس لیا اور ڈور ٹو ڈور تصدیقی مہم چلانے کافیصلہ کیا، تصدیقی مہم مارچ 2022 تک جاری رہے گی۔
دوسری جانب ڈائریکٹر ایم اآئی ایس کو ووٹر لسٹوں میں بے ضابطگیوں کا ذمہ دار ٹھہر اکر معطل کر دیا گیا اور انکوائری شروع کر دی گئی۔ بے ضابطگیوں کے انکشاف پر الیکشن کمیشن نے کمیٹی کی سفارش پر ووٹرز فہرستوں کو مکمل طورپر دوبارہ مرتب کرنےکا فیصلہ کیا ۔ تین مراحل پر مشتمل تصدیقی عمل کے پہلے مرحلے میں تمام صوبائی الیکشن کمشنرز سے ڈیٹا کلکٹرز ڈسپلے سینٹر کی تعداد طلب کی گئی ، دوسرے مرحلے میں تصدیقی مہم کیلئے سٹاف کی تربیت ہوگی جبکہ تیسرے مرحلے میں گھر گھر تصدیقی مہم شامل ہے ۔
نجی ٹی وی کے مطابق تصدیقی مہم کے دوران گیارہ کروڑ سے زائد ووٹرز کاان کی مرضی سے اندراج ہوگا، ڈیٹا فیڈنگ کے بعد ڈسپلے سنٹرز پر ابتدائی فہرستیں رکھی جائیں گی، ووٹرز کو اعتراضات اور پھر درستگی کا وقت دیا جائے گا، جس کےبعد حتمی ووٹرز لسٹیں جاری کی جائیں گی جو عام انتخابات 2023تک تبدیل نہیں ہو سکیں گی ۔