جرمنی میں پاکستانی سفارت خانے پر حملے کیخلاف ’’حرمت پرچم‘‘ مہم کا آغاز
اسلام آباد(قدرت روزنامہ) جرمنی میں پاکستانی سفارت خانے پر مشتعل مظاہرین کے حملے اور قومی پرچم اتارنے کے واقعے کے خلاف وفاقی کابینہ کے ارکان کی جانب سے ’’حرمت پرچم‘‘ مہم کا آغاز کیا گیا ہے۔
وفاقی وزراء نے پاکستانی پرچم کے ہمراہ تصاویر سوشل میڈیا پر جاری کر دیں جبکہ وزراء نے قومی پرچم سے والہانہ محبت کے پیغامات بھی تحریر کیے۔
نائب وزیراعظم و وزیر خارجہ اسحاق ڈار، وفاقی وزراء سردار اویس لغاری، عبدالعلیم خان، رانا تنویر، عطاءاللہ تارڑ سمیت دیگر وزراء نے بھی قومی پرچم کے ہمراہ تصاویر سوشل میڈیا پر جاری کر دیں۔
وفاقی وزیر اطلاعات عطاء اللہ تارڑ نے سوشل میڈیا پر تصویر پوسٹ کرتے ہوئے لکھا کہ ”چاند روشن چمکتا ستارہ رہے، سب سے اونچا یہ جھنڈا ہمارا رہے، پاکستان کے دشمنوں کو واضح پیغام“۔
ڈاکٹر مصدق ملک، علی پرویز ملک اور جام کمال خان نے بھی قومی پرچم اور ’پاکستان زندہ باد‘ کے پیغام کے ساتھ تصاویر جاری کیں۔
وفاقی وزیر اطلاعات عطاءاللہ تارڑ کا اپنے پیغام میں کہنا تھا کہ سیاسی کارکن، صحافی، دانشور، اساتذہ، وکلا، ڈاکٹر، کسان، مزدور، طالب علم، کاروباری حضرات، بیرون ملک محب وطن پاکستانی اور پاکستانی نوجوان ”حرمت پرچم مہم“ کا حصہ بنیں۔ پاکستان کا پرچم ہماری قومی شناخت اور خودمختاری کی علامت ہے۔
عطاءاللہ تارڑ نے کہا کہ پاکستانی پرچم قوم کے اتحاد اور یکجہتی کی نمائندگی کرتا ہے، اگست پاکستان کی آزادی کا مہینہ ہے لہٰذا ’’رمت پرچم‘‘ کی اس مہم کو مسلسل جاری رکھیں گے۔ حرمت پرچم قومی ذمہ داری ہے اور ہر پاکستانی کا فرض ہے کہ وہ اس پر عمل کرے۔
واضح رہے کہ سوشل میڈیا پر وفاقی وزراء کی ’’حرمت پرچم‘‘ مہم کو خوب پذیرائی مل رہی ہے۔
