مصطفی کمال کیخلاف نیب ریفرنس بحالی کی درخواست پر فیصلہ محفوظ

کراچی(قدرت روزنامہ) ایم کیو ایم کے رہنما سید مصطفی کمال و دیگر کیخلاف کلفٹن میں سرکاری اراضی کی الاٹمنٹ ریفرنس بحالی سے متعلق نیب کی درخواست پر فیصلہ محفوظ کرلیا .
کراچی کی احتساب عدالت کے روبرو سابق ناظم کراچی و ایم کیو ایم کے رہنما سید مصطفی کمال و دیگر کیخلاف کلفٹن میں سرکاری اراضی کی الاٹمنٹ ریفرنس بحالی سے متعلق نیب کی درخواست پر سماعت ہوئی .

ایم کیو ایم رہنما سید مصطفی کمال اور دیگر ملزم عدالت میں پیش ہوئے . سید مصطفی کمال کے وکیل حسان صابر ایڈوکیٹ نے مؤقف اپنایا کہ سید مصطفی کمال پر کسی قسم کا مالی فائدہ حاصل کرنے کا الزام نہیں ہے .
عدالت نے پراسیکیوٹر سے مکالمے میں کہا کہ سپریم کورٹ کے فیصلے کے مطابق یہ ریفرنس بنتا ہی نہیں ہے . قانون کے مطابق کسی بھی منتخب فرد پر مالی فاٸدہ حاصل کرنے کا الزام لازمی ہے . اس ریفرنس میں مانیٹری گین کہاں ہے .
عدالت نے ریمارکس دیئے کہ اپنی نااہلی کو نظر انداز نہیں کرسکتے، ہوا میں تیر نہ چلاٸیں . نیب حکام پک اینڈ چوز کو چھوڑ کر قانون کے مطابق چلے . آپ لوگوں نے ڈاکٹر عاصم، شاہد خاقان عباسی اور اس ریفرنس میں الگ الگ پالیسی اپنائی ہے . عدالت نے نیب کی ریفرنس بحال کرنے کی درخواست پر فیصلہ محفوظ کرلیا، فیصلہ 26 اگست کو ہوگا .