پولیس نے دہشتگردی کے خلاف جنگ میں ہراول دستے کی ذمہ داری نبھائی، وزیراعظم شہباز شریف

اسلام آباد(قدرت روزنامہ)وزیراعظم محمد شہباز شریف نے کہا ہے کہ یوم شہدائے پولیس، بہادر پولیس افسران اور اہلکاروں کی جرات اور بہادری کو یاد کرنے کا دن ہے۔ جرائم کی سرکوبی کرتے ہوئے اپنی جانوں کا نذرانہ پیش کرنے والے پولیس اہلکاروں کی قربانیاں لازوال ہیں۔ پولیس نے دہشتگردی کے خلاف جنگ میں ہراول دستے کے طور پر ذمہ داری نبھائی۔
یوم شہدائے پولیس کے موقع پر وزیراعظم محمد شہباز شریف نے اپنے پیغام میں کہا ہے کہ پولیس کے شہید افسران اور اہلکاروں کو خراج عقیدت پیش کرتے ہوئے کہا کہ پولیس اہلکاروں نے ہمیشہ اپنی جانوں کا نذرانہ دے کر قوم کا مستقبل محفوظ اور روشن بنایا۔ شہدائے پولیس قوم کا فخر ہیں، پوری قوم شہید پولیس اہلکاروں کو سلام پیش کرتی ہے۔
وزیراعظم کا کہنا تھا کہ شہید افسران اور اہلکاروں کے خاندانوں کا خیال رکھنا حکومت کی ذمہ داری ہے، اس حوالے سے کوئی کوتاہی نہیں ہونے دیں گے۔ وفاقی حکومت شہدا کے بچوں کی تعلیم و صحت کے لیے ہر ممکن اقدامات اٹھائے گی۔ شہدا کے خاندانوں کا ہر طرح سے خیال رکھا جائے گا۔ بطور وزیراعلیٰ پنجاب شہدائے پولیس کے خاندانوں کے لیے بڑا اور تاریخی پیکج دیا تھا۔