محسن نقوی کرکٹ ٹیم کی تشکیل نو کریں، وزیراعظم بھی سفارش کرے تو نہ مانیں: شہباز شریف

اسلام آباد(قدرت روزنامہ) وزیراعظم شہباز شریف نے کہا ہے کہ محسن نقوی کرکٹ ٹیم کی تشکیل نو کریں اور وزیراعظم بھی میرٹ کے خلاف سفارش کرے تو نہ مانیں۔ محسن نقوی سے کہا ہے کہ کرکٹ ٹیم کی بہتری پر بھرپور توجہ دیں۔
وزیراعظم شہباز شریف نے قذافی اسٹیڈیم لاہور کی تعمیر نو کی تقریب سے خطاب کرتے ہوئے کہا ہے کہ کرکٹ اسٹیڈیم کو جدید خطوط پر استوار کرنے کی اشد ضرورت ہے۔ خوشی ہے کہ قذافی اسٹیڈیم کا انفراسٹرکچر جدید بنیادوں پر تعمیر کرنے کے لیے قدم اٹھایا گیا ہے۔ امید ہے قذافی سٹیڈیم کا منصوبہ تیزی سے مکمل ہوگا۔
ان کا کہنا تھا کہ محسن نقوی نے بطور نگران وزیراعلیٰ منصوبے جلد مکمل کرائے، اب انہوں نے اسٹیڈیمز کی بہتری کی ذمہ داری اٹھائی ہے۔ کرکٹ اسٹیڈیمز کو جدید بنانے کی بہت ضرورت ہے، راولپنڈی، لاہور اور کراچی میں نئے منصوبے خوش آئند ہیں۔ محسن نقوی کی سربراہی میں یہ منصوبے جلد مکمل ہوں گے۔
شہباز شریف نے کہا کہ ایک وقت تھا کہ پوری دنیا میں پاکستان کرکٹ کا طوطی بولتا تھا، امید ہے کہ کرکٹ میں پاکستان کا نام دوبارہ روشن ہوگا، ہم سب کو اور پاکستان کے عوام کو کرکٹ سے بڑا لگاؤ ہے۔
وزیراعظم نے ایک لطیفہ بھی سنایا کہ قذاقی اسٹیڈیم میں نیوزی لینڈ کی ٹیم پاکستان کے خلاف کھیل رہی تھی۔ شفقت رانا گورنمنٹ کالج میں میرے سینئر تھے، وہ اسپن بولنگ کو بہت اچھا کھیلتے تھے لیکن فاسٹ بولر کو فیس کرنے سے جھجکتے تھے۔
آخری اوورز میں نیوزی لینڈ کا فاسٹ بولر گیند کروا رہا تھا جب شفقت رانا رانا 96 پر کھیل رہے تھے۔ شفقت رانا فاسٹ گیند پر مڈ وکٹ پر کیچ آؤٹ ہوکر پویلین لوٹے تو ان کے ایک پرستار نے آواز لگائی کہ ’شفقت بیڈ لک‘ اس پر شفقت رانا نے کمر پر ہاتھ رکھ کر کہا کہ واقعی میری لک (کمر) خراب ہے۔