وزیراعلیٰ بلوچستان نے 21 نادرا مراکز اور 6 موبائل رجسٹریشن وین کا افتتاح کر دیا

نائب وزیر اعظم اسحاق ڈار کی جانب سے صوبے کی ترقی کے لیے نادرا کی کوششوں کا خیر مقدم
کوئٹہ(قدرت روزنامہ)وزیراعلیٰ بلوچستان میر سرفراز بگٹی نے صوبے بھر میں 21 نادرا مراکز اور 6 موبائل رجسٹریشن وین کا افتتاح کر دیا۔
افتتاحی تقریب میں نائب وزیراعظم و وزیر خارجہ اسحاق ڈار اور اسپیکر قومی اسمبلی ایاز صادق بھی موجود تھے۔ وزیر کامرس جام کمال خان، ڈائریکٹر جنرل نادرا بلوچستان ریجن، انتظامیہ کے افسران اور دیگر معززین بھی شریک ہوئے۔
نائب وزیر اعظم اسحاق ڈار کی جانب سے صوبے کی ترقی کے لیے نادرا کی کوششوں کا خیر مقدم کیا گیا۔
پشین، لورا لائی اور خضدار میں خواتین کے لیے خصوصی مراکز قائم کیے گئے ہیں۔ نادرا سینٹر فریدآباد، دشت یہ گورن، بالاناڑی، باباکوٹ، لاکھڑا، کنگری، جائین پروم اور ھیردین نے بھی کام شروع کر دیا ہے جبکہ لوئی، گشکور، گدر، تلاؤ، شہید مہرآباد، پنجپائی، نانا صاحب، کرک جاؤ، مانجھی پور اور لوئی بند میں بھی نادرا مراکز قائم کیے گئے ہیں۔
نادرا حکام کے مطابق نادرا مراکز کے لیے ان علاقوں کا انتخاب کیا گیا ہے جہاں شہریوں کو رجسٹریشن سہولیات کی اشد ضرورت تھی، جن دور افتادہ علاقوں میں انٹرنیٹ دستیاب نہیں وہاں موبائل رجسٹریشن وین کے ذریعے سہولیات فراہم کی جائیں گی۔
نادرا کے مطابق جدید سہولیات سے آراستہ موبائل رجسٹریشن وین پر سیٹلائٹ کے ذریعے انٹرنیٹ کی سہولت میسر ہے، موبائل رجسٹریشن وین کی بدولت دور افتادہ علاقوں کے مکین اپنے گھر کے قریب شناختی دستاویزات بنوا سکتے ہیں۔