پختونخوا؛ عمران خان کی بنائی کمیٹی کی صوبائی وزرا، مشیروں اور معاونین خصوصی کو تنبیہ

پشاور(قدرت روزنامہ) بانی چیئرمین پی ٹی آئی عمران خان کی قائم کردہ تحقیقاتی کمیٹی نے تمام صوبائی وزرا، مشیروں اورمعاونین خصوصی کو تنبیہ جاری کردی۔
کمیٹی رکن کا کہنا ہے کہ حکومتی ٹیم کے ارکان کے خلاف شکایات موجود ہیں ، لیکن کسی کوبلاوجہ پریشان نہیں کرنا چاہتے، انہیں چاہیے کہ وہ احتیاط کریں۔ کمیٹی کو متعدد شکایات موصول ہورہی ہیں، تاہم کسی فرضی یابغیرثبوت کے شکایت پر کراروائی نہیں کررہے۔
انہوں نے کہا کہ کمیٹی پارٹی منشور، حکومتی ایجنڈا ، مالی معاملات اور کارکردگی کی بنیاد پرحکومتی ٹیم کے ارکان کی کارکردگی کا جائزہ لے رہی ہے۔ فی الحال صرف صوبائی وزیر برائے سی اینڈڈبلیو شکیل احمد کی کمیٹی میں پیشی ہوئی ہے۔ جس کسی وزیر،مشیر یا معاون خصوصی کو ضروری سمجھا کمیٹی میں طلب کیاجائے گا۔
رکن کمیٹی کے مطابق ہم نہ تو کسی کو حکومت سے نکال سکتے ہیں اور نہ ہی شامل کرسکتے ہیں ، ہمارا کام بانی چیئرمین کو رپورٹ پیش کرنا ہے۔ ہم ماہانہ یا سہ ماہی رپورٹ نہیں بلکہ ایشوز اور حکومتی ٹیم ارکان کی انفرادی رپورٹیں بھی بانی چیئرمین کو پیش کریں گے۔ بانی چیئرمین نے جس اعتماد کا اظہار کیا ہے اس پر ہر صورت پورا اتریں گے۔ جو حکومتی ٹیم ارکان پارٹی منشور اورحکومتی ایجنڈے کے مطابق کام کررہے ہیں انہیں گھبرانے کی ضرورت نہیں ہے۔