بدعنوانی کا الزام، ڈی ایس پی کیچ اور دو سب انسپکٹرز کو معطل کردیا گیا

تربت(قدرت روزنامہ)ڈی ایس پی اور دو اسسٹنٹ سب انسپکٹرز بدعنوانی کے الزام میں معطل۔ ڈی ایس پی کیچ چاکر خان اور دو اسسٹنٹ سب انسپکٹرز خورشید احمد اور عبدالمجید کو کرپشن اور بدعنوانی کے الزامات کے تحت فوری طور پر ان کے عہدوں سے معطل کر دیا گیا ہے۔ ذرائع کے مطابق، ان افسران پر سرکاری فرائض کی ادائیگی میں سنگین غفلت، اختیارات کے ناجائز استعمال اور مالی بے ضابطگیوں میں ملوث ہونے کے سنگین الزامات عائد کیے گئے ہیں۔ ان افسران پر الزام ہے کہ انہوں نے اپنے عہدے کا ناجائز فائدہ اٹھا کر غیر قانونی سرگرمیوں میں ملوث رہے اور سرکاری فنڈز میں خرد برد کی۔ آئی جی پولیس بلوچستان نے ان افسران کی معطلی کا نوٹیفکیشن جاری کرتے ہوئے مزید تحقیقات کا آغاز کرنے کا حکم دیا ہے۔ تحقیقات کے دوران ان افسران کے تمام سرکاری اختیارات معطل رہیں گے اور انہیں کسی بھی قسم کی سرکاری ذمہ داری نبھانے کی اجازت نہیں ہوگی۔ ذرائع کا کہنا ہے کہ اگر تحقیقات کے دوران ان افسران پر عائد الزامات ثابت ہو گئے تو ان کے خلاف سخت تادیبی کارروائی کی جائے گی، جس میں ملازمت سے برطرفی اور دیگر قانونی اقدامات شامل ہو سکتے ہیں۔ آئی جی پولیس بلوچستان نے اس معاملے کو محکمہ پولیس کی ساکھ اور شفافیت کے حوالے سے انتہائی سنجیدہ قرار دیا ہے اور کہا ہے کہ قانون کے دائرے میں رہتے ہوئے انصاف کے تقاضے پورے کیے جائیں گے۔ عوام کی پولیس پر اعتماد بحال رکھنے کے لیے بدعنوانی اور بدانتظامی کے خلاف زیرو ٹالرنس کی پالیسی پر عمل درآمد کیا جائے گا۔