سینیئر اداکار نعمان اعجاز نے عدنان صدیقی کی تعریف کیوں کی؟
اسلام آباد (قدرت روزنامہ)گرین انٹرٹینمنٹ کی ڈراما سیریل جنٹلمین کو مداح خوب سرا رہے ہیں، زرناب عرف یمنیٰ زیدی کا کردار ہو یا پھر اقبال منا عرف ہمایوں سعید، ڈرامے کی مرکزی جوڑی کو مداحوں کی جانب سے بے حد پسند کیا جارہا ہے، احمد علی بٹ عرف دلبر اور اداکار عدنان صدیقی عرف رحمتی کے کردار کو بھی مداح بے حد پسند کررہے ہیں۔
اس ڈرامے میں ہر کردار ہی قابل تعریف ہے، تاہم اداکار نعمان اعجاز نے عدنان صدیقی عرف رحمتی کے کردار کی تعریف کی ہے۔
نجی ویب کو انٹرویو میں اداکار عدنان صدیقی نے اپنی پیشہ ورانہ زندگی کے کئی اہم پہلو پر گفتگو کی۔
دوران انٹرویو میزبان نے عدنان صدیقی کی بطور رحمتی کے کردار کی تعریف کی، جسے بین الاقوامی شخصیات بھی بے حد پسند کررہی ہیں۔جواب میں اداکار عدنان صدیقی نے انکشاف کیا نہ صرف بین الاقوامی شخصیات بلکہ پاکستانی نامور فنکار بھی رحمتی کے کردار کو خوب سراہ رہے ہیں۔
عدنان صدیقی نے بتایا کہ ’نعمان اعجاز جو شاذ و نادر ہی کسی کی تعریف کرتے ہیں انہوں نے جنٹلمین میں رحمتی کے کردار کو بے حد پسند کیا اور اس کا اظہار کرنے کے لیے انہوں نے مجھے ذاتی طور پر ٹیکسٹ کیا اور جنٹلمین میں میری کارکردگی کو سراہا۔‘
عدنان صدیقی کا کہنا تھا کہ اگر نعمان اعجاز جیسی ہستی نے ان کے کردار کی تعریف کی ہے تو اس میں کوئی خاص بات ضرور ہوگی۔
