190 ملین پاؤنڈ کیس: بشریٰ بی بی نے نیب کیخلاف توہین عدالت کی درخواست دائر کردی

اسلام آباد(قدرت روزنامہ) 190 ملین پاؤنڈ ریفرنس میں بشریٰ بی بی کی بریت کی درخواست پر نیب کا جواب نہ آنے کے خلاف وکیل صفائی نے توہین عدالت کی درخواست دائر کردی، احتساب عدالت نئے توشہ خانہ ریفرنس میں بانی پی ٹی آئی اور بشری بی بی کی ضمانت بعد از گرفتاری کی درخواستوں پر سماعت دو ستمبر تک ملتوی کردی۔
ایکسپریس نیوز کے مطابق احتساب عدالت کے جج ناصر جاوید رانا نے 190 ملین پائونڈ ریفرنس اور نئے توشہ خانہ کیس میں بانی پی ٹی آئی اور بشری بی بی کی بعد از گرفتاری درخواست ضمانت پر سماعت کی۔
190 ملین پاونڈ ریفرنس سماعت میں ریفرنس کے آخری گواہ تفتیشی آفیسر پر جرح آج بھی مکمل نہ ہوسکی، آئندہ سماعت پر بھی بانی پی ٹی آئی اور بشری بی بی کے وکلاء نیب تفتیشی افسر پر جرح جاری رکھیں گے۔
190 ملین پاؤنڈ ریفرنس میں بشریٰ بی بی کی بریت کی درخواست پر نیب کا جواب نہ آنے کے خلاف بشریٰ بی بی کے وکیل سلمان صفدر نے نیب کے خلاف توہین عدالت کی درخواست دائر کردی۔
درخواست میں موقف اختیار کیا گیا کہ عدالتی حکم کے باوجود گزشتہ 8 سماعتوں سے نیب جواب دینے سے گریز کر رہی ہے۔ عدالت نے درخواست پر 4 ستمبر کو ابتدائی دلائل طلب کرلیے۔
دوسری جانب نئے توشہ خانہ ریفرنس میں بانی پی ٹی آئی اور بشری بی بی کی ضمانت بعد از گرفتاری کی درخواستوں پر سماعت دو ستمبر تک ملتوی کردی۔ سماعت میں نیب کے وکیل کی جانب سے تیاری کیلئے مہلت مانگی گئی جس پر عدالت نے ان کی درخواست منظور کی۔