مولانا فضل الرحمان حکومت کا ساتھ دے کر سیاسی خودکشی نہیں کریں گے,لطیف کھوسہ

اسلام آباد (قدرت روزنامہ)پاکستان تحریک انصاف کے رہنما لطیف کھوسہ کا کہنا ہے کہ حکومت کے پاس مولانا فضل الرحمان کو دینے کے لیے کیا ہے؟ مولانا کو کلاشنکوف کا تحفہ دیا گیا، اس کی کیا ضرورت تھی؟

اسلام آباد میں میڈیا سے گفتگو کرتے ہوئے لطیف کھوسہ نے کہا کہ حکومت کی ڈوبتی کشتی کا جو بھی ساتھ دے گا وہ خود بھی ڈوب جائے گا، مولانا فضل الرحمان حکومت کا ساتھ دے کر سیاسی خودکشی نہیں کریں گے۔

لطیف کھوسہ نے کہا کہ حکومت بانی پی ٹی آئی کا ٹرائل ملٹری کورٹ میں کرنا چاہتی ہے تو اپنا شوق پورا کرلے، اصغر خان کا کیس بھی کھول لیں، نواز شریف نے پیسے لیے تھے۔

پی ٹی آئی رہنما نے کہا کہ وفاقی حکومت اپنا وزیر خزانہ بھی نہیں رکھ سکتی، اگر کہیں کوئی اختلاف ہے تو شریف خاندان میں ہے۔

لطیف کھوسہ نے یہ بھی کہا کہ اسلام آباد کے بعد لاہور میں بھی جلسہ کریں گے۔