مسلم لیگ ن اور پیپلزپارٹی کا پنجاب کی سطح پر سیاسی تعاون جاری رکھنے پر اتفاق
اسلام آباد (قدرت روزنامہ)پاکستان مسلم لیگ ن اور پاکستان پیپلزپارٹی نے پنجاب کی سطح پر سیاسی تعاون جاری رکھنے پر اتفاق کیا ہے۔
مسلم لیگ ن اور پاکستان پیپلز پارٹی کی کوآرڈینیشن کمیٹیوں کا اہم اجلاس ہوا جس میں صوبہ پنجاب کی مجموعی ترقی اور عوامی ریلیف کے لیے سیاسی تعاون جاری رکھنے پر اتفاق کیا گیا۔
دونوں جماعتوں کے رہنماؤں نے باہمی تعاون کو بہتر بنانے کی تجاویز پر بھی تبادلہ خیال کیا۔ پیپلز پارٹی کے رہنماؤں نے وزیراعلیٰ پنجاب مریم نواز شریف کے صوبے اور عوام کی ترقی کے لیے اقدامات کو سراہا۔
پی پی پی رہنماؤں کی جانب سے وزیراعلیٰ پنجاب کے صوبے کی ترقی کے لیے جاری پروگراموں کی حمایت کی گئی، جبکہ مریم نواز کی کسانوں، زراعت، نوجوانوں سمیت دیگر طبقات کی بہتری کے لیے اسکیموں میں مل کر آگے بڑھنے پر اتفاق کیا گیا۔
اجلاس میں طے پایا کہ حلقوں میں ترقیاتی اقدامات، نوجوانوں کی ہنرمندی، سولر سسٹم کی عوام کو فراہمی میں اشتراک عمل سے آگے بڑھا جائے گا۔
اجلاس میں یہ بھی طے پایا کہ صوبے میں موسمیاتی چیلنجز سے نمٹنے، امن وامان یقینی بنانے، جدید آئی ٹی نظام کے فروغ پر موثر عملدرآمد کے لیے تعاون جاری رہے گا۔
اجلاس میں پیپلزپارٹی کی طرف سے حسن مرتضیٰ، ندیم افضل چن اور علی حیدر گیلانی نے شرکت کی، جبکہ وزیراعلیٰ پنجاب کی طرف سے سینیئر وزیر مریم اورنگزیب موجود تھیں۔
مریم اورنگزیب نے وزیراعلیٰ پنجاب کی جانب سے وفد کی آمد اور سیاسی تعاون جاری رکھنے پر پیپلزپارٹی کی قیادت اور رہنماؤں کا شکریہ ادا کیا۔
پیپلزپارٹی سمیت تمام اتحادی جماعتوں کو ساتھ لے کر چلنے کی پالیسی پر کاربند ہیں، مریم اورنگزیب
مریم اورنگزیب نے کہاکہ پیپلزپارٹی سمیت تمام اتحادی جماعتوں کو ساتھ لے کر چلنے کی پالیسی پر کاربند ہیں، پاکستان اور عوام کے مفادات کے لیے تمام اتحادی جماعتوں کے اتحاد اور تعاون کے جذبے کو سراہتے ہیں۔
مل کر عوامی مسائل کو حل کرنے پر اتفاق رائے کرتے ہیں، حسن مرتضیٰ
اس موقع پر پیپلزپارٹی کے رہنما حسن مرتضیٰ نے کہاکہ اختلاف رائے ہمارا بنیادی حق ہے، مل کر عوامی مسائل کو حل کرنے پر اتفاق رائے کرتے ہیں۔
علی حیدر گیلانی نے کہاکہ عوامی ریلیف کے فارمولے پر اتفاق کرنے پر ہم وزیراعلیٰ مریم نواز اور مسلم لیگ ن کی کمیٹی کے مشکور ہیں۔
انہوں نے کہاکہ تمام رکاوٹوں کو دور کرکے آگے بڑھنے میں ہی اتحادی حکومت کے ثمرات عوام کو ملیں گے۔
