جماعت اسلامی کے وفد کی چیف الیکشن کمشنر سے ملاقات، مطالبات پیش

لاہور(قدرت روزنامہ) جماعت اسلامی کے وفد نے چیف الیکشن کمشنر سے ملاقات میں اپنے مطالبات پیش کردیے . لیاقت بلوچ کی قیادت میں جماعت اسلامی کے وفد نے چیف الیکشن کمشنر سکندر سلطان راجا سے ملاقات کی .

اس موقع پر وفد کی جانب چیف الیکشن کمشنر کے سامنے مطالبات رکھے گئے .
بعد ازاں میڈیا سے گفتگو کرتے ہوئے لیاقت بلوچ نے کہا کہ اسلام آباد میں بلدیاتی انتخابات کروائے جائیں . بلدیاتی انتخابات کے 4 مرتبہ التوا کے لیے بدنیتی پر مبنی قانون سازی کا سہارا لیا گیا . انہوں نے کہا کہ ملک کے سب سے بڑے صوبے پنجاب کے عوام بھی بلدیاتی انتخابات کے حق سے محروم ہیں .
انہوں نے کہا کہ الیکشن کمیشن آف پاکستان بدنیتی پر مبنی قانون سازی کے حربوں سے اسلام آباد کے ووٹرز کو محفوظ رکھے . بلدیاتی انتخابات میں جو بھی رکاوٹ پیدا کررہا ہے، الیکشن کمیشن پاکستان اس کے خلاف خود تادیبی کارروائی کرے یا سپریم کورٹ میں ریفرنس بھیجے .
لیاقت بلوچ کا کہنا تھا کہ عدالتِ عظمیٰ کے حکم پر لوکل گورنمنٹ کے لیے انتخابی حلقہ بندیاں الیکشن کمیشن پاکستان کی ذمے داری ہے . وفاقی اور صوبائی حکومتوں نے اسلام آباد اور صوبوں میں قانون سازی کرنی ہے .
انہوں نے کہا کہ کراچی میئر شپ انتخابات میں حکومتی مداخلت پر الیکشن کمیشن پاکستان مفلوج اور بے بسی کی تصویر بنا رہا . الیکشن کمیشن پاکستان 2024کے انتخابات کے عوامی مینڈیٹ کے حقیقی حل فارم45 کی بنیاد پر فیصلہ کرے . 2018ء اور 2013ء کے انتخابات کے نتائج بھی متنازع رہے ہیں . 2024ء کے انتخابات نے ملک کو سیاسی، اقتصادی، سماجی اور آئینی حقوق کے بحرانوں سے دوچارکردیا .