ایپل کی آئی او ایس 18 اپ ڈیٹ جاری: ’اب آئی فون گم یا چوری ہونے کی صورت میں استعمال کرنے کے قابل ہوگا؟‘

اسلام آباد (قدرت روزنامہ)ایپل کے اسمارٹ فونز کے موبائل آپریٹنگ سسٹم کا نیا ورژن آئی او ایس 18 متعارف کروا دیا گیا ہے۔ اس نئے آپریٹنگ سسٹم میں ایپل انٹیلی جنس سمیت متعدد نئے فیچرز صارفین کو دستیاب ہوں گے۔
یہ آپریٹنگ سسٹم بیٹا ورژن میں جون 2024 میں جاری کیا گیا تھا اور ستمبر کے شروع میں آئی فون 16 سیریز کے ساتھ اس کا باضابطہ اعلان کیا گیا۔ آئی او ایس 18 میں صارفین کو مختلف فیچرز دیکھنے کو ملیں گے جن کی فہرست درجہ ذیل ہے۔
آئی او ایس 18 میں میڈیا لائبریری خودکار طور پر آرگنائز ہوگی اس میں سے اضافی ٹیبز کو ہٹا دیا گیا ہے۔ اس نئے آپریٹنگ سسٹم کے تحت آپ کے لیے مختلف موضوعات پر مبنی تصاویر کو تلاش کرنا آسان ہوجائے۔
اس کے علاوہ میسجز میں تحریری جملوں اور ایموجیز کو آئی میسج میں اینیمیٹڈ شکل میں استعمال کرنا ممکن ہوگا۔ اسی طرح آپ کسی میسج کو شیڈول بھی کرسکیں گے جو آپ کے طے کردہ وقت پر سینڈ ہوگا۔
آئی او ایس 18 نے رازداری کے لیے آئی فون کے پاس کوڈ کے ذریعے کسی بھی ایپ کو لاک کرنے کی صلاحیت متعارف کرائی ہے۔ اب آپ ایپس کو چھپا بھی سکتے ہیں جو اسے ایک پوشیدہ اور لاکڈ ایپس فولڈر میں لے جاتا ہے۔
آئی او ایس 18 میں ایک بالکل نیا پاس ورڈ ایپ شامل کیا گیا ہے پاس ورڈ ایپ سے پاس کیز، ٹو فیکٹر تصدیقی کوڈز کو متحرک رکھنا آسان ہوگا
ایپل نے آئی فونز کے لیے بھی گیم موڈ متعارف کرایا ہے جس کو ٹرن آن کیے جانے پر بیک گراؤنڈ سرگرمیاں محدود ہوجائیں گی تاکہ گیمز کھیلتے ہوئے ہائی فریم ریٹس برقرار رہ سکے۔ ایپل نے گیم موڈ پہلے میک پر متعارف کرایا تھا جو اب آئی فون پر بھی دستیاب ہو گا۔
آئی او ایس 18 میں آئی میسجز کے لیے نئے فیچرز متعارف کروائے گئے ہیں۔ صارفین کسی بھی ایموجی کو ٹیپ بیک ری ایکشن کے طور پر استعمال کر پائیں گے، اس میں فارمیٹنگ آپشنز جیسے بولڈ اور انڈر لائن، میسجز کو شیڈول کرنے کی صلاحیت بھی موجود ہوگی۔ ساتھ ہی ساتھ اینڈرائڈ ڈیوائسز کے ساتھ میسجز کے لیے آر سی ایس سپورٹ بھی متعارف کروائی جائے گی۔
آئی او ایس 18 میں ایک ویڈیو ریکارڈ کرنے کے آپشن کو مزید بہتر بناتے ہوئے ایپل اس میں تبدیلی کی گئی ہے۔ اب ویڈیو ریکارڈ کرتے ہوئے اسے روک کر دوبارہ وییں سے شروع کرنے کا نیا آپشن دیا گیا ہے۔
آئی او ایس 18 ایکسیسبیلٹی فیچرز کی ایک نئی رینج بھی متعارف کرائے گا جس میں آئی ٹریکنگ شامل ہوگی۔ آئی ٹریکنگ کی مدد سے صارفین اپنے فون کو آنکھوں کی حرکات کے ساتھ کنٹرول کر پائیں گے۔ ساتھ ہی ساتھ میوزک ہیپٹکس بھی فراہم کیے جائیں گے جو موسیقی سنتے وقت ٹیکٹائل فیڈ بیک فراہم کرتا ہے۔
ایپل کا نیا آپریٹنگ سسٹم صرف آئی فون ایکس ایس یا اس کے بعد کے ماڈلز کے لیے دستیاب ہوگا اور 2017 یا اس سے پہلے کے فونز میں اسے اپ ڈیٹ نہیں کیا جاسکے گا۔
یعنی آئی فون ایکس ایس، ایکس ایس میکس، ایکس آر، آئی فون 11، 11 پرو، 11 پرو میکس، آئی فون 12، 13، 14 اور 15 سیریز کے فونز میں اس نئے آپریٹنگ سسٹم کو استعمال کرنا ممکن ہوگا۔
آئی فون میں آئی او ایس 18 متعارف کروائے جانے کے بعد صارفین کی جانب سے خوشی کا اظہار کیا جا رہا ہے۔ ان کا خیال ہے کہ اب یہ فون زیادہ محفوظ ہو گیا ہے۔ ایک صارف کا کہنا تھا کہ نئی اپڈیٹ کے ساتھ ایپل نے آئی فون کی سیکیورٹی کو ایک نئی سطح پر پہنچا دیا ہے۔ اب آئی فون گم یا چوری ہونے کی صورت میں ناقابلِ استعمال ہوگا اور اس کے پرزے بھی فروخت کے قابل نہیں رہیں گے۔
تنویر اعوان لکھتے ہیں کہ آئی فون 16 کے بعد آئی او ایس 18 متعارف کروایا گیا ہے جو غیر متوقع فیچرز کا حامل ہے جن پر آپ کو یقین نہیں آئے گا اور یہ فیچرز آپ کسی صورت مس نہیں کرنا چاہیں گے۔
کئی صارفین سوال کرتے نظر آئے کہ اگر آپ نے آئی او ایس 18 ڈاؤنلوڈ کر لیا ہے تو آپ کو کون سا فیچر سب سے اچھا لگا؟