ڈیرہ بگٹی، مسلح افراد اور امن فورس میں فائرنگ کا تبادلہ، 2رضاکار جاں بحق، 5 زخمی
ڈیرہ بگٹی(قدرت روزنامہ)ضلع بارکھان اور ڈیرہ بگٹی کے سرحدی علاقے اوچھڑی میں مسلح افراد اور مقامی قبائلی امن فورس کے درمیان فائرنگ کے باعث قبائلی امن فورس کے دو رضاکار جاں بحق جبکہ 5 زخمی ہوگئے رات گئے تک دو طرفہ فائرنگ جاری رہنے کی اطلاع تھی، وزیراعلی بلوچستان سرفراز بگٹی کے چچازاد بھائی حاجی خان محمد مسوری بگٹی کے مطابق ڈیرہ بگٹی اور بارکھان کے سرحدی علاقے اوچھڑی میں مسلح افراد کی جانب نجی کمپنی کے موبائل ٹاور کو دھماکا خیز مواد سے اڑانے کے بعد علاقے میں مسلح افراد کی موجودگی کی اطلاع پر مقامی قبائل اور امن فورس کے رضاکاروں نے مسلح افراد کا تعاقب کیا تو مسلح افراد نے فائرنگ کردی فائرنگ کی زد میں آکر قبائلی امن فورس کے دو رضا کار جاں بحق جبکہ پانچ زخمی ہوگئے ڈسٹرکٹ ہیلتھ آفیسر ڈیرہ بگٹی ڈاکٹر اعظم جان بگٹی کے مطابق زخمی رضاکار جوانوں کو فوری طور پر بذریعہ سرکاری ایمبولینس علاقہ رکھنی کے ہسپتال ریفر کردیا گیا جبکہ زرائع کے مطابق آخری اطلاعات آنے تک فائرنگ کا سلسلہ جاری تھا۔