لاہور میں نوجوان خاتون پولیس کانسٹیبل دن دیہاڑے دوست کے ہاتھوں قتل

لاہور(قدرت روزنامہ) ہربنس پورہ کے علاقے میں فائرنگ سے خاتون جاں بحق ہوگئی۔
پولیس کی نفری موقع پر پہنچی اور تحقیقات کے بعد بتایا کہ مقتولہ کی شناخت 26 سالہ سمن کے نام سے ہوئی جو پولیس کانسٹیبل تھی اور اسے اس کے دوست نے قتل کیا۔
عینی شاہدین کے مطابق لیڈی کانسٹیبل موٹرسائیکل پر ایک نوجوان کے ساتھ آئی اور پھر دونوں کے درمیان جھگڑا ہوا، نوجوان نے لیڈی کانسٹیبل پر قریب ایک پارک میں تشدد کیا۔ مقامی لوگوں نے نوجوان کو منع کیا اورلڑکی سے معافی مانگنے کا کہا تو نوجوان نے پسٹل نکال کر پہلے ہوائی فائرکیے جس سے مقامی لوگ منتشر ہوگئے۔
پھر نوجوان نے لیڈی کانسٹیبل کے پہلے پاؤں میں اور پھر سرمیں تین گولیاں ماریں۔ نوجوان قتل کی واردات کے بعد جائے وقوعہ سے فرار ہوگیا۔
ڈی آئی جی آپریشنز فیصل کامران نے واقعے کا نوٹس لے لیا اور ایس پی کینٹ کو ملزم کی جلد از جلد گرفتاری کی ہدایت کردی۔