پنجگور: دہشت گردی کے واقعہ کی ایف آئی آر درج، صدر اور وزیراعظم کی طرف سے اظہار مذمت

کوئٹہ (قدرت روزنامہ)صوبہ بلوچستان کے علاقے پنجگور میں مزدوروں کے بہیمانہ قتل کا مقدمہ تھانہ سی ٹی ڈی میں درج کرلیا گیا . ایف آئی آر میں قتل، اقدام قتل، دہشت گردی سمیت دیگر دفعات شامل کی گئی ہیں .

دہشت گردی کے اس بدترین واقعہ کے فوراً بعد پولیس نے علاقے کو گھیر لیا، مجرموں کی تلاش جاری ہے . پنجگور پولیس کا کہنا ہے کہ ہفتے کے روز بلوچستان کے ضلع پنجگور میں بلوچستان لبریشن آرمی کے دہشگردوں نے فائرنگ کر کے 7 افراد کو قتل کر دیا ہے، یہ واقعہ پنجگور کے علاقے خداآبادان میں پیش آیا جہاں ایک مکان میں مزدور رہائش پذیر تھے . پولیس کے مطابق رات کے تقریباً ساڑھے 9 بجے دہشگردوں نے مکان میں گھس کر اندھا دھند فائرنگ کر دی جس کے نتیجے میں 6 افراد موقع پر ہی جاں بحق ہو گئے جبکہ 2 افراد شدید زخمی ہوئے جنہیں پنجگور سول اسپتال منتقل کیا گیا لیکن وہاں وہ زخموں کی تاب نہ لاتے ہوئے چل بسے . پولیس کے مطابق قتل ہونے والے تمام مزدوروں کا تعلق صوبہ پنجاب کے ملتان ڈویژن کے شجاع آباد علاقے سے ہے، جن کی شناخت ساجد، فیاض، خالد، شفیق، افتخار احمد، سلمان، اللہ وسایا اورمحمد رمضان کے نام سے ہوئی ہے جبکہ زخمی ایک شخص کی شناخت بلال کے نام سے ہوئی ہے . ڈسٹرکٹ پولیس آفیسر(ڈی پی او) پنجگور فاضل بخاری نے وی نیوز سے بات کرتے ہوئے بتایا کہ قتل ہونے والے مزدور پنجگور میں تعمیراتی کام سے منسلک تھے . تاہم واقع کی تحقیقات کا سلسلہ شروع کردیا ہے . وزیراعظم شہبازشریف نے پنجگور میں بے گناہ مزدوروں کے قتل کا نوٹس لے لیا . وزیراعلیٰ بلوچستان سے رپورٹ طلب کرلی . تفصیلات کے مطابق پنجگور میں کالعدم بی ایل اے کے دہشت گردوں نے ایک اور بزدلانہ حرکت کی ہے . گھر میں گھس کر فائرنگ کرکے سات بے گناہ مزدوروں کو بے دردی سے قتل کر دیا . جاں بحق تمام افراد کا تعلق جنوبی پنجاب سے تھا . وزیراعظم شہباز شریف نے مجرموں کو کو کیفر کردار تک پہنچانے کے لیے ہر ممکن اقدامات اٹھانے کی ہدایت کی . شہبازشریف کا کہنا ہے پاک سرزمین سے ہر قسم کی دہشت گردی کو جڑ سے اکھاڑ پھینکنے کیلئے پرعزم ہیں . بلوچستان حکومت نے دہشت گردوں سے چن چن کر بدلہ لینے کا اعلان کر دیا . صدرمملکت آصف علی زرداری نے بھی واقعے کی مذمت کرتے ہوئے قیمتی جانی نقصان پر گہرے دُکھ اور افسوس کا اظہار کیا . کہا نہتے مزدوروں کو نشانہ بنانے والے دہشت گرد عناصر کے خلاف موثر کارروائی کی جائے . وزیرداخلہ محسن نقوی نے کہا نہتے مزدوروں پر فائرنگ کرنے والے عناصر کسی رعایت کے مستحق نہیں . تمام تر ہمدردیاں جاں بحق مزدوروں کے لواحقین کے ساتھ ہیں . غم کی گھڑی میں سوگوار خاندانوں کے ساتھ کھڑے ہیں . . .