وفاقی کابینہ 26ویں آئینی ترمیم کا مسودہ آج منظور کرے گی، سینیٹ و قومی اسمبلی اجلاس 3 بجے ہوں گے

اسلام آباد (قدرت روزنامہ)گزشتہ شب وفاقی کابینہ کا فوری اجلاس طلب کیا گیا جس میں 26ویں آئینی ترمیم کے مسودے پر غور کیا گیا۔ اجلاس پارلیمنٹ ہاؤس میں وزیراعظم چیمبر میں ہوا جس میں تمام وفاقی وزرا موجود تھے۔ وزیراعظم شہباز شریف اور اٹارنی جنرل منصور عثمان، اسحاق ڈار، اعظم نذیر تارڑ اور محسن نقوی بھی موجود تھے۔
اجلاس میں وزیرِ قانون و انصاف نے 26ویں آئینی ترمیم پر تفصیلی بریفنگ دی۔ اجلاس میں متحدہ قومی موومنٹ، مسلم لیگ ق، استحکام پاکستان پارٹی سمیت کابینہ کے ارکان کو 26ویں آئینی ترمیم کے حوالے سے اعتماد میں لیا گیا۔ کابینہ اجلاس آج سہ پہر 2 بجکر 30 منٹ پر دوبارہ منعقد کیا جائے گا۔
اجلاس کے بعد وفاقی وزیر قانون اعظم نذیر تارڑ نے بتایا کہ کابینہ کا اجلاس آج دوپہر اڑھائی بجے دوبارہ ہوگا۔ بعض تبدیلیوں کے بعد کابینہ سے ترمیمی بل کی منظوری آج لی جائے گی۔
اعظم نذیر تارڑ نے بتایا کہ پارلیمانی کمیٹی میں ڈرافٹ کو حتمی شکل دی گئی، مولانا فضل الرحمان کو بھی ڈرافٹ کا حصہ بنایا گیا، کمیٹی نے جو ڈرافٹ منظور کیا تھا وہ کابینہ کے سامنے رکھا،کابینہ کو پوری طرح بریف کردیا گیا ہے، پچھلے 4 ہفتوں سے تواتر سے یہ کام جاری ہے۔
دوسری جانب سینیٹ کا اجلاس آج سہ پہر 3 بجے تک ملتوی ہو گیا ہے جب کہ قومی اسمبلی کا اجلاس شام 3 بجے ہوگا۔