مستونگ میں دہشتگردی کا واقعہ قابل مذمت ،بلوچوں کی جاری نسل کشی میں ایک اور باب کا اضافہ ہے،بلوچ یکجہتی کمیٹی

کوئٹہ(قدرت روزنامہ)بلوچ یکجہتی کمیٹی نے اپنے ایک بیان میں کہا کہ بلوچ یکجہتی کمیٹی (BYC) بلوچستان کے شہر مستونگ میں ہونے والے سفاک دہشت گردانہ حملے کی شدید الفاظ میں مذمت کرتی ہے جس میں سات قیمتی جانوں کا ضیاع ہوا۔ یہ المناک اور وحشیانہ حملہ آج یکم نومبر کو صبح پیش آیا، جس نے بلوچ عوام کی جاری نسل کشی میں ایک اور بھیانک باب کا اضافہ کیا۔ آج کے وحشیانہ قتل عام میں پانچ معصوم طلباء اور دو پولیس اہلکار جان بحق ہوئے ۔ان کا کہنا تھا کہ مستونگ، جہاں موت سڑکوں پر دندناتی پھرتی ہے، اس طرح کے متعدد حملے دیکھے گئے، جن کے نتیجے میں سینکڑوں جانیں ضائع ہوئیں۔ ہر گزرتے دن کے ساتھ، نسل کشی کے زخم گہرے ہوتے جا رہے ہیں جب کہ قانون نافذ کرنے والے ادارے اور نام نہاد حکومت کی توجہ پرامن سرگرمی پر ظلم کرنے اور اختلافی آوازوں کو خاموش کرنے پر مرکوز ہے، وہ آوازیں جو اس طرح کی بربریت اور وحشیانہ کارروائیوں کے خاتمے کا مطالبہ کرتی ہیں۔ان کے مطابق ریاست سیکورٹی فورسز کو سیکڑوں بلین فراہم کرتی ہے، شہری آبادی کے تحفظ کو یقینی بنانے میں ناکام رہتی ہے جبکہ ان کے حقوق کو مزید دبا رہی ہے۔ بلوچستان میں اس کی غلط مہم جوئی کے نتیجے میں افراتفری اور انارکی پھیلی ہے، جس سے لوگ مسلسل عدم تحفظ اور دہشت کی زندگی گزارنے پر مجبور ہیں۔ بلوچ قوم ان دہشت گردانہ حملوں کے پیچھے پوشیدہ ہاتھ کو پہچانتی ہے ۔ہم دنیا بھر کی انسانی برادری سے اپیل کرتے ہیں کہ وہ بلوچستان کے عوام کے قتل عام کو روکنے کے لیے اقدامات کریں۔