بجلی تقسیم کارکمپنیوں کی اجارہ داری ختم، صارفین اب دیگر سپلائرز سے بھی بجلی خرید سکیں گے

اسلام آباد (قدرت روزنامہ)پاکستان میں بجلی کی تقسیم پر مامور کمپنیوں کی اجارہ داری کا خاتمہ، صارفین بجلی اب تقسیم کا رکمپنیوں کے علاوہ دوسرے سپلائرز سے بھی خرید سکیں گے۔
پاور ڈویژن اعلامیہ کے مطابق ترجمان نے کہا کہ وزارت توانائی کے ری اسٹرکچرنگ پلان کے تحت این ٹی ڈی سی کو 3 اداروں میں تقسیم کیا جا رہا ہے۔
اس تقسیم کے تحت پہلی کمپنی نیشنل گرڈ کمپنی آف پاکستان (این جی سی پی) ہوگی جو پاکستان میں بجلی کی ترسیلی خدمات کو مؤثر اور قابلِ اعتماد بنائے گی۔
دوسرے نمبر پر انرجی انفراسٹرکچر ڈیویلپمنٹ اینڈ مینجمنٹ کمپنی (ای آئی ڈی ایم سی) ترقیاتی سرگرمیوں اور پروجیکٹ مینجمنٹ کو سنبھالے گی، جس سے پاکستان میں نجی سرمایہ کاری کو فروغ ملے گا۔
تیسرے نمبر پر انڈیپینڈنٹ سسٹم اینڈ مارکیٹ آپریٹر (آئی ایس ایم او) پاکستانی صارفین کے لیے ایک موثر، جامع اور شفاف مسابقتی بجلی کی مارکیٹ بنانے کا ذمہ دار ہوگا۔
ترجمان پاور ڈویژن کے مطابق صارفین اب تقسیم کار کمپنیوں کے علاوہ دیگر سپلائرز سے بھی بجلی خرید سکیں گے، جبکہ مزید سپلائرز کی بجلی فروخت سے مارکیٹ میں زیادہ خریدار حصہ لے سکیں گے۔