فوج سمیت تمام ادارے ہمارے، پی ٹی آئی کے ساتھ جو کچھ ہورہا ہے اس کے ذمہ دار شہباز شریف ہیں، اسد قیصر

اسلام آباد (قدرت روزنامہ)پاکستان تحریک انصاف (پی ٹی آئی) کے سینیئر رہنما و سابق اسپیکر قومی اسمبلی اسد قیصر نے کہا ہے کہ فوج سمیت تمام ادارے ہمارے ہیں، ان کو سیاست میں حصہ نہیں لینا چاہیے، پی ٹی آئی کے ساتھ جو فسطائیت ہورہی ہے اس کی ذمہ داری شہباز شریف اور وفاقی حکومت پر عائد ہوتی ہے۔
نجی ٹی وی سے گفتگو کرتے ہوئے انہوں نے کہاکہ ہم چاہتے ہیں کہ ادارے اپنے آئینی دائرہ اختیار میں رہتے ہوئے کام کریں۔
اسد قیصر نے کہاکہ ہم عمران خان کی رہائی کے لیے اپنی جدوجہد جاری رکھیں گے، صوابی جلسے کے ذریعے کارکنوں کو متحرک کیا گیا ہے، اب جب بھی عمران خان کال دیں گے ہم سب حاضر ہوں گے۔
انہوں نے کہاکہ موجودہ حکومت نے ہمارا مینڈیٹ چوری کیا ہوا ہے، ملک اس وقت خطرناک صورتحال کا سامنا کررہا ہے۔
پی ٹی آئی رہنما نے کہاکہ ہم ملک میں قانون کی حکمرانی چاہتے ہیں، اور اس کے لیے ہم تمام سیاسی جماعتوں سے بات کریں گے، اور انہیں اپنے ساتھ شامل کریں گے۔
اسد قیصر نے کہاکہ ہم چاہتے ہیں کہ ملک میں قانون کی حکمرانی ہو، ہمیں لیول پلیئنگ فیلڈ ملے، آئین و قانون کو سیاسی مفادات کے لیے استعمال نہیں کرنا چاہیے۔
انہوں نے کہاکہ ملک میں امن و امان کی صورتحال خراب ہے لیکن حکومت کا سارا دھیان پی ٹی آئی کو دبانے پر ہے، ہم امن و امان کے معاملے پر کسی سے بھی بات کرسکتے ہیں۔
انہوں نے کہاکہ عمران خان پر بنائے گئے تمام کیس سیاسی ہیں، جب بھی عدالتیں آزاد ہوں گی تو بانی پی ٹی آئی کسی کیس میں گرفتار نہیں رہیں گے۔
سابق اسپیکر قومی اسمبلی نے کہاکہ ڈونلڈ ٹرمپ اور عمران خان کی دوستی کا سب کو معلوم ہے، لیکن ہم کسی کو بھی ملکی معاملات میں مداخلت کی اجازت نہیں دیں گے۔