عمران خان کی رہائی کی کوششوں میں میرا کوئی کردار نہیں، فضل الرحمٰن
جمہوریت کی کمزوری میں سیاستدانوں کا بڑا کردار ہے، اپنے مفادات کے لیے جمہوریت پر سمجھوتا کیا، سربراہ جے یو آئی
اسلام آباد(قدرت روزنامہ)مولانا فضل الرحمٰن نے کہا ہے کہ عمران خان کی رہائی کی کوششوں میں میرا کوئی کردار نہیں ہے۔
جمعیت علمائے اسلام کے سربراہ مولانا فضل الرحمن نے میڈیا سے گفتگو کرتے ہوئے کہا ہے کہ ہمیشہ آئین اور جمہوریت پر شب خون مارا گیا۔ جمہوریت کی کمزوری میں سیاستدانوں کا بڑا کردار ہے۔ سیاستدانوں نے اپنے مفادات کے لیے جمہوریت پر سمجھوتا کیا۔
انہوں نے خواجہ آصف کے ساتھ لندن میں پیش آئے واقعے کی مذمت کرتے ہوئے کہا کہ برطانیہ کی ذمے داری ہے کہ خواجہ آصف کے معاملے میں قانون کے مطابق کارروائی کرے۔
مولانا فضل الرحمٰن نے کہا کہ نئے قانون کے ذریعے ملک کے اندر موجود ہر شہری کو مشکوک بنا دیا گیا ہے۔ انہوں نے مزید کہا کہ نہ ہم امریکا کی سیاست میں مداخلت کرتے ہیں نہ انہیں اپنے ملک میں مداخلت کی اجازت دے سکتے ہیں۔
ڈونلڈ ٹرمپ کے حوالے سے سوال پر جواب دیتے ہوئے انہوں نے کہا کہ امریکا میں ری پبلکن کی حکومت ہو یا ڈپلومیٹس کی، دنیا کے لیے ان کی پالیسی ایک ہے۔
انہوں نے کہا کہ میں کسی سیاستدان کو قید کرنے کے حق میں نہیں ہوں۔ فضل الرحمن نے میڈیا سے بات کرتے ہوئے عمران خان کی رہائی کی کوششوں میں اپنے کردار کی تردید بھی کی۔
