خواجہ آصف نے لندن میں ہراساں کرنے کے واقعے کی رپورٹ پولیس کو درج کرادی

لندن(قدرت روزنامہ)وزیر دفاع خواجہ آصف نے لندن میں قتل کی دھمکی اور ہراساں کرنے کے واقعے کی رپورٹ پولیس کو درج کرادی . پاکستان ہائی کمیشن لندن کی جانب سے جاری اعلامیے کے مطابق وزیر دفاع خواجہ آصف پاکستان ہائی کمیشن لندن آئے جہاں انہوں نے پولیس کو ٹرین واقعے کی رپورٹ درج کرائی .

پاکستان ہائی کمیشن کے مطابق خواجہ آصف نے پولیس کو قتل کی دھمکی اور ہراساں کرنے کے واقعے کی تفصیلات سے آگاہ کیا .

خواجہ آصف نے پولیس کو بتایا کہ واقعہ 11 نومبر کی سہ پہر ساڑھے 3 بجے ایلزبتھ لائن میں پیش آیا، میں لندن نجی دورے پر آیا ہوں، اپنے ایک عزیز کے ہمراہ الزبتھ لائن کے ذریعے ریڈنگ جا رہا تھا کہ اس دوران یہ واقعہ پیش آیا . خواجہ آصف نے بتایا کہ تین سے چار افراد پر مشتمل ایک خاندان کے افراد نے ٹرین میں ہراساں کیا، بلااجازت ویڈیوبنائی، نازیباالفاظ استعمال کیے اور چھری سےقتل کی دھمکی دی . واقعے میں ملوث کسی شخص کو نہیں پہچانتا . لندن ٹرانسپورٹ پولیس سی سی ٹی وی ویڈیوز کی مدد سے ملزمان کا پتہ لگائے .

خواجہ آصف کا کہنا تھا کہ قتل کی دھمکیاں اور ہراسانی کے ایسے واقعات برطانیہ میں مقیم 17 لاکھ پاکستانی نژاد برطانوی شہریوں کے لیے بھی باعث شرم اور قابل افسوس ہیں .

پاکستان ہائی کمیشن لندن کا کہنا ہےکہ واقعے کی تحقیقات لندن ٹرانسپورٹ پولیس کر رہی ہے .