ڈسکہ، بہو کو بے دردی سے قتل کرنے والی ساس اور نند نے اعتراف جرم کرلیا

اسلام آباد (قدرت روزنامہ)ڈسکہ میں بہو کو بے دردی سے قتل کرنے والی ساس اور نند نے اعتراف جرم کرلیا ہے۔
ڈسکہ کے گاؤں کوٹلی مرلاں میں مبینہ طور پر سسرالیوں نے بہو کو قتل کر کے لاش کے ٹکڑے بوری میں ڈال کر نالے میں پھینک دیے۔
پولیس کے مطابق والدین نے بیٹی سے رابطہ نہ ہونے پر پولیس سے رابطہ کیا، جس پر پولیس نے ساس، نند اور نند کے بیٹے کے خلاف مقدمہ درج کرلیا۔
پولیس کی حراست میں دوران تفتیش ملزمان نے قتل کا اعتراف کر لیا،اعتراف جرم کرنے والوں میں مقتول کی ساس اور نند شامل ہیں۔
پولیس نے ملزمان کے خلاف قتل کا مقدمہ مقتول خاتون کے والد کی مدعیت میں درج کر لیا ہے، پولیس کے مطابق مقتولہ کا شوہر ملک سے باہر ہے۔
یاد رہے کہ گوجرانوالہ کے گاؤں کوٹ منڈ کی رہائشی 26 سالہ زہرہ کی شادی کوٹلی مرلاں کے قدیر سے چار سال قبل ہوئی تھی جن سے ان کا ایک بیٹا ہے۔
قدیر شادی کے بعد بیرون ملک چلا گیا تو ساس بہو میں ٹھن گئی ساس نے اپنی بیٹی کے ساتھ مل کر بہو سے نفرت کی انتہا کردی۔
پولیس حکام نے مزید بتایا ہے کہ مقتولہ زہرا 7 ماہ کی حاملہ تھی اور اس کا شوہر قدیر کاروبار کے سلسلے میں ملک سے باہر ہے۔
ریسکیو 1122نے ملزمہ کی نشاندہی پر نالے سے مقتولہ زہرا کی لاش نکال کر موترہ پولیس کے حوالے کردی ہے مزید قانونی کارروائی جاری ہے۔